Ka Day Care Centre ka SAN-KER da kyrriah yaka cha i thaw wa thymme ynne ka sngi na iwa jooh em ha Chutwakhu, Jowai cha i yung wa jooh man kam ka Urban Health Centre wa em ha Chutwakhu hi heiwa da ya soi leh yaka soskular wa ar snem hapyrdi ki arliang yow chim wai ya kani ka yung deiwa su T. 6,000 chi bnai.
Kani ka Day Care Centre u man ko leh kam ka OPD kawa ye u wan chim dawai kamjooh kawa pait ya kitu kiwa rap joor yei chitom wei kiwa emkaam yei ya syllok nadooh kiwa yaleh yow pyntkut yow kinjri i dih ya ki jait pynmuaid.
Ka Dr. D. Khonglah, Junior Specialist Psychologist, SAN-KER hawa e yaki ktien pdiang sñiawbha da ong ko wa i daw wa booh yaka Day Care Centre toh yow e yarap yei chait i khiah i pyrkhat pyrdaiñ wei deiwa em chajan daw pynsuk ko yaki paidbah heithaw wow lai ki cha Shillong.
Neiliang u Dr. S. Syiem, Director SAN-KER da ong u wa neiliang ka SAN-KER kreh ko leh kam ini i jooh cha Nongstoin wa Mawkyrwat wei ha ri-loom Jaiñtia jooh wan u cha Jowai Civil Hospital, tangwa nadooh wa kut ka soskular waka sorkar da sñiaw yei emkaam wow pteiñ yei kreh yow pynsuk leh yaki paidbah yow lait ki wow lai cha Shillong. Da ban joor u leh wa ini ym toh yow chna poisa heiwa nadooh u 2007 ka SAN-KER da man ko kam ka Trust.
Da pynchlur u leh ya kiwa emkaam yarap wow wan ki chakhmat ym toh wow sarom neibhah ini ym toh i leh pop, ini toh i kjut wa emkaam sumaar.
Da pyntip u leh wa daw em 2 ngut ki Doctor wow pait ya kani ka thaw iwa man leh kam ka thaw yachem kiwa emkaam yarap tangwa ym toh kawa hoi u sah miet.
Ha kani ka sngi da yoh leh yei klam na u Rev. E.R. Tongper wa na u Waheh Chnong ka Chutwakhu Dorbar Chnong u P. Lyngdoh.
