Ynne ka sngi ka 14 tarik kawa man leh ka sngi Valentine’s Day, neiliang ki pulit ka West Jaiñtia Hills da chim kabu ki ya kani ka sngi kam chibynta yong ka “Road Safety Week” heiwa da pyrchang ki wow leh deiwa rap phær yow pynkynmoo yaki paidbah yei emkaam wow bood yaki kyndon aiñ hawa yah kari.
Ha kani ka sngi ki pulit hapoh i yahkhmat ka District Executive Force wa ka Jowai Traffic Branch da pynchitom ki deiwa e syntu kulab ya ki bru wa tyngkheiñ aiñ yah kari hapoh ka District heithaw wow daiñ kuna ya ki da ka poisa yow pynsahkynmoo yaki wow bood yaka aiñ.
Ya ini da leh ha Jowai, Amlarem, Dawki, Phramer wa ha Ummulong.
Hawa yaklam wa u SP ka District, u Bikram D. Marak da ong u wa yeini i pynchitom da leh ya kiwa tyngkheiñ aiñ nadooh kiwa khlem helmet, kiwa chong le ngut ha ki thuk-thuk, kiwa khlem pyndait seatbelt wa kiwi kiwi.
Da pyntip u leh wa du ynne ka sngi da e hadooh kamwa 500 tylli ki syntu cha kiwa tyngkheiñ aiñ yah kari.
Ya ki yalang pynsñiawthooh paidbah hajrong kammon wow man kiwa syndong hawa yah kari da pynman ynnin leh ha chnong Amlarem wa Iooksi.
