Ki bri kwai yong ka chnong Borkhat wa Natbor, Elaka Lakadong, East Jaiñtia Hills District kiwa em ha khappood wa ka ri Bangladesh da chah pynjæd tympra ki ha ki damok kiwa da pam khiar ya ki dieñ kwai wa ki tre dieñ kwai wa 8,059 tylli yong ki 18 ngut ki tre.
Neiliang u Waheh Chnong ka Borkhat wa Natbor u Kyrmen Swer wa u Lap Suchen, da pyntip ki wa ki damok da leh ki yeini ha ka 04-02-2021, heipor wa ki warep ym em ki cha bri neidaw ki kaam chnong.
Kini ki bri kwai wa chah ktah toh kiwa haap hapoh ka chnong Borkhat wei nadooh nynde ymjooh em kam ini i jia hapoh ka chnong.
Neiliang u Kyrmen da ong u wa hadien wa ka chnong da yoh yutip ko yeini i jia neiliang ki ar chnong ha kani ka 12 tarik uni u bnai da ujor ki ha Lad Rymbai Police Out Post pyrchah ya ar ngut ki bru kiwa da suba wa emkti ha ini i kaam ya kiwa kynthup ya u Ioomiki Ryngkhlem na Pdengwah Khynriam wa u Bir Umrynsong na Kwator.
Neiliang ki warep kwai kiwa da chah ktah ha ini i kaam ki damok, kiwa da antaad wa em ki 18 ngut, ynne ka sngi hawa yaklam wa kiwa pathai khubor da sñiawsih ki hajrong i dooh wa kynjoh da ki lak tyngka.
Uni u kwai toh uwa dadep sumaar la 5-6 snem tangwa ki damok da leh khiar leh pynsih hiwot ki ya oo.
Hajrong ini neiliang ka chnong da kyntu ki ya ki bor wa em ha i bor ka aiñ wow kem noh ya kiwa emkti katkam ki kyndon ka aiñ.
