Sa chisien, sa kawi ka luti u warim, ki khon khynroo ka chnong Dkhiah West da lai thooh wei da lai luti ki ka hadien wa lai yaka luti warim na Dkhiah cha Jowai haka 25-02-2017.
Ynnin ka 13 tarik, kamwa 96 ngut wa kynthup ya 32 ngut ki manbei wa 4 ngut ki waheh kam kiwa yahkhmat da mih ki naka chnong Dkhiah West dang step yow thooh yaka luti wa lai u warim deiwa lai kjat palat 10 kynta, deiwa emlang ki khynroo kam na Khliehriat East uwi, na Mynthlu uwi, na Jalyiah 2 ngut wa na Sonapur uwi heiwa kiwa boon toh na Dkhiah West hi.
Chwa u mih da yoh i klam wai phang na u Dr. Ryngkat Phawa deiwa sdang yei lai kjat na Dkhiah West najan yung Club heipor 5:25 i step hadien wa dep duwai da u Muni Swer, wei da poi ha yingkieñ Borkhat Tisang Bridge heipor kamwa 4:35 i janmiet.
Na Dkhiah West da lai lyngba ka Umsyllih, na Rymbai Pampyrthat ter ter chadooh chnong Umsatai hadooh wa poi ha chnong Pynurkba dep neitæ da lai sa na ki khloo ki kjam, ki luti warim wajah hadooh chnong Umlyngsha neitæ da lai na sarok kajiak wei da bood biang yaka luti rim narood Iakadong hadooh Lama deiwa mih ha dieñgjri Lama. Da lai biang kajiak na sarok wei da psiah biang sa chisien na ka luti rim wa kit wa bah ki waheh dang tynde.
Hadooh katni ka luti dang biang ki moo wa siang ki warim tangwa da sap da ki phlang ki khloo wym em de pynemkaam ki bru. Da poi leh cha ki thaw rep kwai, ki riat ki synrang chwa wow poi ha chnong Borgkat hajan yung knia u syiem.
Kani ka luti warim yow poi cha ka chnong Borkhat, Muktapur, Sylhet, Jaiñtiapur toh kawi na ki luti wa ki warim jooh lai bha ki, man ko leh ka luti lai yaw, luti lai thma, luti syiem ki nong Sutnga wa waroh ka hima yow poi cha ka yaw Borkhat, yaw Sylhet wei yow poi leh cha ka chnong ki syiem ha Jaiñtiapur.
Ka chnong Borkhat man ko kawi na ki chnong wa nadooh ki por warim toh kawa jooh pynman yaw hapoh ki dieñjri kiwa dang yieñ hadooh katni harood ka wah Tisang. Da em leh ha kani ka chnong yaka thaw knia yong ki syiem. Iwa boon wa thoh chaphang kani ka chnong toh kiwa em leh ha ki kot skur. I thaw knia yong u syiem toh iwa dang yieñ hadooh katni.
Ha ini i lai kjat, waroh kiwa chimbynta da sñiawkmen wei sñiaw tympang sakhiat ki wow booh wei wow ban yaki kjat haki dienkjat ki syiem, ki chipai wa waroh ki heh ki san warim. Ki dak wa paaw haki luti toh wa iyi ki warim da leh ki neibynta ka Ri Pnar yong i.
Kiwa chimbynta ha kani ka sngi kynthup ki ya ki Doctor, kiwa sikai College, ki khynroo wei kamjooh ki khynnah kiwa hapoh 15 snem kiwa em 4 ngut.
Ki waheh kynthup ki ya u Giren Swer (78 snem), u Muni Swer (76 snem), u Keydras Sympli (75 snem) wa u Kwirland Tlang (62 snem).
Ka Pershia Phawa wa ka Syrpailin Phawa toh ki arngut ki manbei kamjooh kiwa sikai College, Dr. Ryngkat Phawa wa Dr. Shwameki Phawa toh ki arngut ki Doctor kiwa da ya chimbynta.
Kani ka lai kaap kjat man ko kam ka nongmuna wow pynkynmoo u pynneh pynsah ya ki dienkjat ki waheh warim, wa emkaam u kaap u lai yoh i u tip wa ka rymaw toh ka bei wa psa baam psa dih ya i.
