Ka MLA yong ka Congress, ka Dr. M Ampareen Lyngdoh da ong ko wa i pynslem wow pynkrehkaam ya ka Inner Line Permit ha Meghalaya da pynman kamke ko ya ini i dawa wa da mynjur da ka Assembly. Da ong ko wa lada ym ye wow pynkrehkaam ya ka ILP ha ka jylla Meghalaya, ka sorkar toh wow e ko leh yei daw.
Da ong ko leh wa u e daw wa ka ILP daw ktah ko yaki kaam uiñke suwari ha ka jylla toh i klam yong khynnah, neibhah ha kiwi ki jylla kiwa pynkrehkaam ya ka ILP wa kiwi ki aiñ hanla ym ku boon ware ha ki kaam uiñke suwari, tangwa ym duna i pawnaam kam ka jylla Meghalaya.
Ka Ampareen da ong ko ya ini hadien wa neiliang u Montri Rangbah ka jylla da pyntip u wa u Amit Shah daw wan yaklam u wa ki seiñbhalang ha nongbah Shillong ha u bnai wow wan hajrong ka ILP.
Da ong ko wot hawa u Montri ka sorkar pyrdi da wan poi u ha Shillong, tangwa ym em e por u wow yaklam yeiwa dawa yong ka jylla, wei wot hawa ki Montri sorkar lai ki cha Delhi ini wadep leh ym em yohlaad ki wow yaklam wa lada ka sorkar pyrdi daw e næ ym em ya ka ILP, tangwa kamwa paaw, i yaklam man bait ko du hajrong ka Meghalaya Residents Safety and Security Act.
Ka MLA da ong ko leh wa ka sorkar wa yalam da ka Congress ha ki por wa da dep, ka sñiaw ko wa ym emkaam ya ka ILP, tangwa hadien wa da wanrah ya ka Citizenship Amendment Act (CAA), da pynman ya ka Congress wow uiñdien biang heiwa da kyrchaan yaka Resolution wa da wanrah da ka sorkar ha Assembly.
