Dei mynsien wa sñiawkhia hajrong i sih ki bynta wa boon u sarok ha Jowai, ynnin ka sngi ka Synjuk ki Waheh Chnong Jowai, hapoh i yahkhmat u President u Alan Niangti wa u Asst. Secretary, u Ryum T. Khonglah da yachem ki ya u Executive Engineer ka PWD Jowai South Division, u B. Niangti.
Ha ini i yachem da pynsñiaw wa da sih ware ki sarok ha Jowai kiwa da pynthut ya i lai i wan ki bru kamtæ emkaam wow chna pynmiat (Repair) noh ya ki.
Hadien i yachem wa uni u sahep, neiliang u Alan Niangti da ong u wa u sahep ka chnat da pyntip u wa katkam wa man katni ka poisa duna bha ko wei ymye wow chna ya waroh ki sarok ha Jowai.
U sahep da pyntip u leh wa ya u sarok Dulong College Road wa u sarok Thomas Jones da sih ware u katwa kamtæ ymye de wow chna pynmiat ya oo.
Da kyntu u leh ya ka Synjuk wow jied ya ki bynta sarok wa emkaam wow chna pynmiat noh wei wow pyntip cha ka chnat khnang wow thooh laad wow ye u leh yeiwa emkaam.
