Haka 17 tarik, u Lasting Suchiang wa u Pyndaplang Muksor deiwa kyrchaan ki paralok da lai ki wow e yarap da ki kymmor cha ki 6 ngut ki bru kiwa em i duna hei doh i pran haka chnong Umdilien, Iooksi.
Ha chwa ini, da em ka yalang wa tbian kawa pynlai da u waheh chnong ka chnong Umdilien, u E. Sumer heiwa da e khublei ya kini kiwa em yei mynsien wa sbun wow noh kyllooid cha kitu kiwa duna hei doh i pran hapoh ka chnong.
“I yarap yong phi ya kiwa dooh wa chitom wa kiwa duna hei doh i pran man ko chibynta i chakri yong phi ya u Blai,” ong u E. Sumer, deiwa kyrkhu kyrdoh wei kitbok kitrwiang leh ya kitai ki rangbah wow nang ye ki u lai chakhmat yei thmu wa bha yong ki.
Neiliang u Lasting Suchiang hawa e yei klam da pynchlur u ya kitu kiwa duna hei doh i pran wym toh u dooh mynsien ki næ dooh kyrmen ki.
