Hadien wa mih ka khubor wa ong wa da pdiang wow pynhiar ya ka bai kari kamai heipor wa yachem wa ka Synjuk ki Waheh Chnong Jowai da em i sñiawthooh bakla hapyrdi ki paidbah wa kiwa kamai.
Ynne ka sngi, u President ka Jowai Shillong Tourist Cab Association (JSTCA), u Anthony Pohshna da pyntip u wa ka seiñ da chong pyrkhat ko wa ki dkhot ka seiñ na Ri-loom Khasi hajrong i dor bai kari ki kari khian kiwa kamai na Jowai cha Shillong wei na Shillong cha Jowai.
Da pyntip u wa ha ka yalang da rai wa ka bai kari hi u neh ko kamjooh (T. 200) samen na Jowai cha Shillong wa na Shillong cha Jowai.
Kamtæ da kyntu ya ki paidbah wow yakrehlang ki wa ka seiñ ha kam kini ki por wei hajrong katwon ngut u thap ha kari chisien chong daw pyntip won hadien.
