Ka District Legal Services Authority (DLSA), East Jaintia Hills District ynne ka sngi da pynman ko ya i pynsñiawthooh paidbah hajrong ka ‘Poverty Alleviation Scheme’ wa ka Para Legal Volunteers (PLV) ha Samasi Community Hall, Samasi, East Jaiñtia Hills District.
Ya ka yalang da pynlai da u DS Marbaniang, Chief Judicial Magistrate cum Secretary DLSA, East Jaiñtia Hills District uwa da klam hajrong ki Scheme waphær waphær neibynta ki paidbah khlem pait ya ka niam, ka jaitbru, i man chynrang næ kynthai wa kiwi kiwi.
Da batai u leh kammon wa ki Para legal Volunteer embynta bha ki wow yarap ya ki bru ha kiwa boon rukom.
Da ong u leh wa ka Samasi da jied ya ka wow booh ya ka Legal Clinic and Support Centre.
Kiwi kiwa da klam ha kani ka sngi toh u S. Pdang Legal Aid Counsel, u K. Ksoo, President, Khliehriat Bar Association, u R. War, General Secretary, Khliehriat Bar Association, Pastor J. Myrmen, Para Legal Volunteer kiwa da klam hajrong ki Para Legal Volunteers (PLV) wa u Gram Sevak, u M. Mynso, u M. Allya, Para Legal Volunteer (PLV) katwa u B. Paslein da e u ya ki kyntien e khublei.
Ha kani ka sngi da chimbynta da ki waheh chnong wa Secretary chnong yong ki 17 chnong wa kynthup ya ka Kremmyrsiang, Shyrwang, Mynthning, Mookhain, Mulait Bri Sumer, Jalaphet Bri Sumer, Mynthlu, Samasi, Kyrluh, Lakasein, Mooriap, Umkyrpong, Kseh, Pala, Lyrket, Khahnar, Mooknor wa kiwi kiwi.
