Ynne ka sngi da pynman ya ka yalang hapyrdi ki bor District ka West Jaiñtia, Ri-Bhoi District ka jylla Meghalaya wa ka West Karbi Anglong District ka Assam ya kawa da tip leh kam ka Border Coordination Meeting ha Circuit House, Jowai.
Ha kani ka yalang ya ka West Jaiñtia Hills da yahkhmat da u DC, u Garod LSN Dykes, chirup wa u Superintendent of Police u Bikram D. Marak, ya ka Ri-Bhoi da yahkhmat da ka Deputy Commissioner ka District, ka RM Kurbah, katwa ya ka West Karbi Anglong won da yahkhmat da u ADC ka District, wa ka Superintendent of Police ka Ramandeep Kaur.
Ya ka yachem da pynman kam chibynta wow pynkhreh ya ka MLA Election ha jylla Assam ka wow man ha u Naitung (April) uni u snem.
Ki phang wa da yaklam neibynta kani ka Election kynthup ki nadooh wow khang yei khayi kiad, drugs wa kiwi ki mar pyrchah aiñ cha Assam na Meghalaya, i lai i wan ki damok wa kwah u pynawri.
Da yaklam leh hajrong i pynkrehkaam ya ka Election Code of Conduct kamjooh leh i man i long ki thaw thap Vote namo Polling Station ha khappood ki ar jylla.
Hawa yaklam wa u DC ka West Jaiñtia Hills, u Garod LNS Dykes da ong u wa kam kini ki yalang jooh pynman hi neipor cheipor chwa ka Election wei lait na kani ka kaam (Election) ym em de u yaklam ya kiwi tawon ki bynta.
