Kam i dak wow beiñ joor ya ki kaam ki bru khloo wa leh yaki kaam wymman, ynne ka sngi kiwa chong chnong ha ka thaaiñ Umoid da ya mih paidbah ki nadooh ki khynah skur ka thaaiñ Umjarain, deiwa sdang yei lai kjat naka chnong Umjarain wei da pynkut da ka yalang ha madan yong ka chnong Shaidshaid, Umoid.
Ha kani ka sngi da emlang u MLA ka Mawkyrwat, u Renikton L. Thongkhar, MDC u Carnes Shohshang, u Principal yong ka St. Xavier’s College Umoid, u Fr. Paul kiwa yalam niam waphær waphær kiwa sikai, ki Rangbah Shnong wa ki manbei manpa.
Neiliang u Fr. Paul da ong u wa ki kynhun Balang ki em ki ha katai ka thaw neibynta wow chakri wow kyntu ya ka thaaiñ, khamtam hawa yatoh wa i stat i tip, wei da kyntu u ya ki paidbah wa lada chem ki ya iwon iwon i duna wow lai yaklam wa kiwa pynlai wei ki man ki kiwa smat u ap u sñiaw yei e yumut neibynta i bha, ym toh deiwa thombor neibhah wa deiwa mih umsnam ym wanrah ko ya u soh i jop.
U MDC u Carnes Sohshang da kyntu u ya ki phadar Jesuit wa ym toh wow ieh noh ya katai ka thaaiñ wa ki kaam chakri yong ki, heiwa da ong u wa kam uwa mihkhmat da e u yei kyrchaan wei ya krehlang ya katai ka seiñ ki phadar yow kyntu ya ka thaaiñ.
U MLA u Renikton L Tongkhar da ong u wa kam u MLA da yaklam u ya ini i jia wa u Montri Rangbah, uwa da ong wa boi daw hap wow pyndam ya waroh ki kaam pynroi wa da mang ka sorkar ha ka thaaiñ. Da beiñ u leh ya ki damok deiwa ong wa ini toh i leh ki bru kiwa dang doom wei pyrshah u ya kam kini ki kaam pyrchah aiñ kiwa pynsih wei pynmihsnam.
Kam wow kdaw heini wa ini i lai paidbah toh yow beiñ yei chah thombor kiwa mylla ha St. Xavier’s Girls Hostel kawa em ha Umoid, SWKH iwa da wanrah leh ya i khlaad noh uwi na kitai kiwa mylla iwa da jia hei miet ka 24 tarik uni u bnai.
