Ynnin ka 27 tarik man ko ka sngi wow sah kynmoo ya ki khon ka Seiñraij Niamtre Ummulong heiwa lyngba ka Sports and Games Committee hei yahkhmat u Secretary u B. Siangshai da pynman ya ka Ram Sing Lamare Cricket Tournament 2021 heiwa da yoh yei kyntien waiphang na u chongknor ka Seiñraij Niamtre Ummulong u Mul Passah kamjooh da khana ya ka parom wa tbian heiyatoh wow (T) Ram Sing Lamare da u lamphang ka Seiñraij u E. Rymbai.
Da yoh leh i klam na ki kur u Ram Sing Lamare kiwa da yaroh ya ka Seiñraij wow pynsahnaam ya u ma yong ki.
Ha kani ka sngi, u MLA ka Jowai, u Wailadmiki Shylla da man u kam u kongsan katwa u MDC ka JHADC u Octomewat Lamin da man u kam u symbood kongsan.
Kam u kongsan, u Wailadmiki Shylla da ong u wa kam kiwa yalehke toh u em ki ka thong wow lai yaleh cha ki kyrdan lympung wa heh wei da kyrmen u wa kani ka lympung u yarap ko u saiñdur ya ki khon kynroo khnang wow yoh khih yoh kreh ki neini.
Da yoh ya i kyntien ngoohblai na u Knermiki Passah wa ki kyntein e khublei na u Sainborlang Rymbai.
Ha kani ka sngi da em ka yalehke hapyrdi ka Evergreen pyrchah ya ka Royal Angtuz heiwa ka Evergreen da kamai ko 207 Run na ki 20 over katwa ka Royal Angtuz yoh ko du 84 Run donhi deiwa dooh lut ya waroh kiwa Bat.
Ha ini i rah yei naam jop da ka Evergreen, uwa boon dooh wow yoh Run toh u Kamni Suna 46 Run katwa u Ker Nongrang da yoh boon Wicket dooh u deiwa yoh 4 Wicket.
