Ka Rotary Club Jowai kam kawi na ki seiñ wa em ha chityllup pyrthai chirup i yakrehlang wa ka Seiñ Kynjei, Panaliar ha ka sngi Thymblieñ ka 27 tarik u Thohlakhmi da pynman ki ya ka e snam sñiawbha namo ko Blood Donation ha Jowai Civil Hospital Blood Bank heiwa ki 17 ngut ki dkhot yong kini ki ar tylli ki seiñ dei sñiawkhia da wan ki wow e mynkna yei snaam yong ki.
U Rtn. S.K. Lato, MPHF President Rotary Club Jowai kam u chongknor yong ka yalang ha ki kyntien yahkhmat da khana pynsñiaw u leh i parom wa tbian chaphang ka yurim krehkaam yong ka Rotary neitæ da pynbood sa ki kyntien na u Rtn. Dr. Kamwadae Syngkon, uwa da klam chaphang i myntoi yong ki bru hawa e yei snaam kamjooh leh i klam i batai na u Kermi Phawa, President ka Seiñ Kynjei
Ka Dr. P. Shylla, Medical & Health Officer In-charge Blood Bank Jowai hawa klam da e ko i sñiawngooh wa khroo ya ka Rotary Club Jowai wa ya ka Seiñ Kynjei kiwa da chim ka luti wow leh yeiwa bha tam hei wow pyn-im yei mynsien wa kordor yong ki para bru.
Chooh chooh e mynsien ko leh ya kiwi deiwa klam wa batai chaphang ki laad ki luti yong i chakri ka Blood Bank Jowai neitæ kam ka bru watoh u pait yei lai bait lai ryntih ka Blood Bank Jowai, dap ko dei sñiaw sarong wow yoo wa kat dang mih ki sngi, ki khon ka Ri Jaiñtia dang boon kiwa wan wow e mynkna yei snaam yong ki wei ini pynyoo i wa ki bru em ki itæ i mysnien sñiawkhia wow yarap næ u pynim yei mynsien wa kordor yong ki para bru.
Ka Rtn. E.F. Gatphoh Charter President Rotary Club Jowai hei chimbynta lang wow e i klam da khana ko wa ka thong i pynman ya kani ka e snam toh chibynta i leh burom yei lai luti wa 116 snem ka Rotary International wa 25 snem ka Rotary Club Jowai neitæ da e mynsien ko leh ya ki dkhot ka Seiñ Kynjei deiwa ong wa yooluti wa i yakrehlang neibynta i miat i bha ka imlang sahlang yong ka ri wa ka jaitbru u nang pteiñ chooh chooh i neini chakhmat ha ki dur ki rukom waphær waphær.
Khaddooh ya kani ka yalang da pynkut da ki kyntien sñiawngooh na u Rtn. Samehi Laloo, Secretary Rotary Club Jowai.
