Ka lympung 1st Mowkaiaw Constituency Premier League Cricket Tournament 2021 kawa da pynman da ka 4-Mowkaiaw Unite, ynnin ka sngi ka Super King da yaleh pyrchah ko ya ka Knight Rider.
Ha kani ka yakhun, ka Super King da booh thong ko 145 Run deiwa haap 9 Wicket na ka 20 Over wei kiwa kamai Run boon dooh toh u Kitbor Lyngdoh 62 na ki 48 bol, u Markini Lathong 38 na ki 35 bol katwa kiwa yoh boon Wicket boon dooh na ka Knight Rider toh u Balambha Shadap 3 Wicket wa u Regardful Lapasam 2 Wicket.
Ka yakhun da man ko kawa yaryngkat bor heiwa ka Knight Rider emkaam ko u jop 15 Run na ki 6 bol deiwa sah chi Wicket. Kamtæ ka Knight Rider da ye ko wow poi thong deiwa jop da 1 Wicket na ki 20 Over.
Ya ka Super King uwa kamai Run boon dooh toh u Kaidamang Dkhar 60 na ka 50 bol, u Arban Lyngdoh 14 Run na ka 13 bol, katwa kiwa yoh Wicket na ka Super King toh u Pynshai Lathong wa u Biang Suchiang kiwa da yoh mar 3 Wicket.
Haka yalehke wa ar, da pynman hapyrdi ka Sunrise pyrchah ya ka Royal Challenger heiwa ka Sunrise da yoh ko 142 Run deiwa dooh 7 Wicket na ki 20 Over wei kiwa kamai Run toh u Buhti Shadap 58 na ki 43 bol wa u Monbait Shadap 27 na ki 22 bol katwa kiwa yoh Wicket na ka Royal toh u Medon Lapasam 2 Wicket, u Tondonsoon Rymbai, u Sandabiang Lathong wa u Mewan Suchiang kiwa yoh mar 1 Wicket.
Ka Royal Challenger da yoh ko du 99 Run na ki 18 Over deiwa dooh waroh ki Wicket heiwa da kamai boon Run dooh u Tondonsoon Rymbai 30 Run na ki 17 bol wa na u Guestar Hadem 22 Run na ki 38 bol katwa kiwa yoh boon Wicket dooh toh u Iow Lathong 4 Wicket, u Baniengskhem Laloo 3 Wicket wa u Eleazer C Dkhar 2 Wicket wei ha kani ka yakhun ka Sunrise da jop ko ya ka Royal Challenger da 42 Run.
Haka 6 tarik ka yalehke u man ko hapyrdi ka Sunrise pyrchah ya ka Indian heipor 8:30 i step katwa ka yalehke wa ar won toh hapyrdi ka KingXI pyrchah ya ka Royal Challenger heipor 12:00 i sngi.
