U MDC ka Congress na Nongstoin, u Gabriel Wahlang da ong u wa i mantre ya ki thaw da kiwa chong chnong, da ki tre chnong da tipmit da ka Supreme Court, deiwa pynrap wa ka KHADC ym em bynta ko hawa yatoh wa ki marpohkhyndaw kamjooh ka aiñ MMDR Act, tangwa toh wow pynemkaam ya ki laad hajrong ki thaw neibhah ka toh kawa pait ya i khyndaw i chyiap.
U Gabriel da ong u ya ini hawa chimbynta ha ka yatai wa da wanrah da u MDC ka Rambrai Jyrngam, u Bajop Pyngrope hajrong ki bynta yong ka Council hawa yatoh wa i tih ya ki marpohkhyndaw.
Hawa jubab ya i yatai, u Deputy Chief Executive Member wa pait yaka chnat Mining ha KHADC, u Gigur Myrthong da kubur u wa ka Council ka doohnong ko nei wym yoh bhah lang na ki dan ka sorkar wa kynthup na ka GST, heiwa da ong u wa neiliang ka chnat daw yaklam ko ya ka sorkar wow e lang ya i bhah na ki dan cha ka Council.
U Myrthong da ong u wa ki Policy næ rukom krehkaam hadooh katni ym biang ki wei wot i bhah na ki District leh ka Council ym ko. Ha i jooh i por da pyntip u leh wa i bhah neibynta wow pynplung biang ya ka rymaw wa da chah pynsih ha ki thaw wa tih wa khloh ya ki marpoh khyndaw, khamtam ya u mooyong leh, ka Council ym yoh ko, tangwa da pynemkaam bait da ka sorkar lyngba ka bhah wa da yoh na ka Meghalaya Environment Protection Fund kawa man 10%.
Ha i jooh i por u Deputy CEM da e u yei kular leh hapoh ka yung dorbar wow chong pyrkhat neibynta wow pynbha chooh chooh ya i rukom krehkaam khamtam wa i rukom pynemkaam ya ki thaw wa tih ya ki marpohkhyndaw.
