Ka Meghalaya People United Front (MPUF) East Jaiñtia Hills District, hapoh i yahkhmat u Kyrshan Blah deilang wa u Kynmaw Phawa, General Secretary Wapung Unit, u Juny Phawa, President Sanshnong, u Kmenlang Siangshai, General Secretary EJHD da lai pait ki yaka Lumshnong PHC ynne ka sngi heiwa ki wakreh da pynsñiaw ki wa kani ka PHC dang em duna ko kiwa krehkaam.
Ka seiñ hawa yaklam wa u Doctor kamjooh leh wa ki wakreh ha kani ka PHC da pyntip ki wa hei yong sakhiat, ha kani ka PHC toh wow em arngut ki Doctor, tangwa kamwa man kattæ, kani ka PHC ka em ko du uwi u Doctor wei ki Nurse leh dang duna bha ki ha kani ka PHC kamjooh ya ki kaam Chowkidar kawa kani ka PHC da em ko du uwi uwa em leh i duna dkhot doh.
Hawa yatoh wa ini i duna ki wakreh ha kani ka PHC, neiliang ka seiñ da dawa ko na ka sorkar wa toh u pait ya ka chnat i chait i khiah wow pynbiang yaki wakreh katkam i emkaam, neibhah wa kani ka PHC ka pait ko ya chiboon tylli ki chnong kiwa em ha kani ka thaaiñ wei khmatam kawa em ha u National Highway uwa pynyabi ya chiboon tylli ki jylla uwa chait jia ki ya tyrrah kari man-ki-por.
Sa kawi ka liang wa ka seiñ da chem ko wa ki paibah wa lai chim dawai na kani ka PHC da pynsñiaw ki wa kiwa boon hi ki wakreh ha kani ka PHC toh kiwa klam khor ya kiwa wan chim dawai, kiwa wan emkaam, kiwa wan yachem Doctor, kamtæ ka seiñ da kyntu ko ya ki bor wa toh u pait wow sneiñ ki ya ki wakreh wym toh u pynkhor ktien.
