Kiwa chong chnong ka Mynkrem Shangpung, West Jaiñtia Hills da pynman ki yaka yalang ynne ka sngi wow pynsñiaw yei pyrchah yei thmu wow booh yaka karkhana Coke Factory hapoh ka chnong.
Ha kani ka yalang wa pynman ha Govt. LP School, Mynkrem da emlang ki dkhot ki Shangpung Unit ka KSU wa JSU kiwa da pyrchah joor ya ini i thmu wow booh ya kani ka karkhana hapoh ka chnong.
Da pyrchah na ki daw wa daw ktah i em kani ka karkhana yei chait i khiah, yaka rymaw, ki um-baam um-dih, ki jhoor ki jhep. Daw ktah ko leh yei chongkha chongman khamtam yaki kynthai manda wan kiwi ki jaitbru ha ka chnong kamjooh daw ktah ko yaka pateiñ wow wan ha waroh ki liang.
Kamtæ da ong wa lada emkaam wow wanrah yaka roi ka paar, toh u wanrah da ki wym ktah yaka rymaw kam ki College, ym toh da ka karkhana wa ktah ya waroh i jait khamtam hawa da khang leh ka NGT wow tih mooyong.
