U MLA ka Bharatiya Janata Party na Pynthorumkhrah uwa man leh u Montri ha ka sorkar Meghalaya Democratic Alliance (MDA), u Alexander Laloo Hek da pynsñiaw u wa ka sorkar emkaam ko wow bichaar biang ya i rai yong ka kynhun Montri (Cabinet) hajrong i pynuiñ biang ya ka dan Income Tax yong ki sahep ka All India Service Officers (AISO) hadooh 95% da ka sorkar jylla.
Da ong u wa hajrong kani ka phang, da yaklam u leh wa u President ka NPP Meghalaya, u Dr. WR Kharlukhi neidaw wym pu yohlaad wow yachem ya u Montri Rangbah, tangwa da ong u wa daw yaklam sani bha ya kani ka phang wa u Conrad K Sangma.
Da ong u wa oo toh u Montri ha ka sorkar, tangwa ha ka sngi wa ka sorkar chim ko ya i rai ym em u ha Shillong, deiwa pynrap leh wa kwah u wa ka sorkar daw bichaar biang ya ini i rai.
Hawa kylli ya i daw, u Hek da ong u wa ka sorkar ym ye ko wow leh chiliang neibhah ym toh du ki sahep sorkar wa kreh ha Secretariat kiwa wan na baar wow chakri ya ki paidbah ka jylla, deiwa ong wa em leh ki wakreh kiwa wan na baar ka jylla kam ha ICAR kiwa e ya i chakri ya ki warep næ kiwi ki sahep ha kiwi ki chnat, wei kini leh ye ki wow dawa ya i jooh, iwa mut wa ka sorkar daw hap su lut ko ya ka dan ka wym ye wow man wei ka jylla leh neiwon u yoh ko ya ka poisa.
Kam wow pynkynmoo wa ka sorkar jylla ha ka tayaw wa da dep, da rai ko wow pynlut T. 1.45 klur chi snem neibynta wow pynuiñ 95% ka dan Income Tax yong ki sahep, ya kawa da rai wow pynkrehkaam nadooh ka mang tyngka wow wan.
