Kiwa dang yoh COVID-19 ha India ha kini ki 24 kynta da em ki 14,989 ngut, kiwa dang chait da em ki 13,123 ngut, kiwa dang yap 98 ngut iwa mut wa da ku kiwa dang em ya uni u khñiang da 1,768 ngut.
Ka jylla wa boon dooh wa ku kiwa dang em ya uni u khñiang toh ha Maharashtra 1,477 ngut katwa ka jylla wa boon dooh wa hiar kiwa dang em ya uni u khñiang toh ha Kerala 590 ngut.
86% na kiwa dang yoh toh kiwa em ha ki 6 tylli ki jylla kiwa boon dooh ha Maharashtra 7,863 ngut, Kerala 2,938 ngut, Punjab 729 ngut, Tamil Nadu 462 ngut, Gujarat 454 ngut wa ha Karnataka 437 ngut.
Waroh kiwa da chait da em ki 97.06% kiwa em 1,08,12,044 ngut, kiwa dang em ya uni u khñiang da em ki 1.53% kiwa em 1,70,126 ngut, kiwa yap 1.41% kiwa em 1,57,346 ngut. Deilang dapoi 1,11,39,516 ngut kiwa da dep yoh ya uni u khñiang hapoh ka ri.
Hadooh ka 2 tarik, i e dawai yada COVID-19 hapoh ka ri da dep wow e la 1,56,20,749 sien heiwa na kini da em 67,42,187 ngut ki Health Care Worker kiwa da yoh yei dawai chisien wa 27,13,144 ngut kiwa yoh la arsien. Na ki Front Line Workers won da em 55,70,230 ngut kiwa da yoh yei dawai chisien katwa 834 ngut kiwa da yoh la arsien.
Neibynta ki bru paidbah kiwa em 60 snem chaneiñ da em 5,22,458 ngut kiwa da yoh yei dawai chisien katwa kiwa em 45 hadooh 59 snem kiwa em chwa yei chitom da em 71,896 ngut kiwa da dep yoh yei dawai.
Ynne ka sngi neiliang u President ka ri u Ram Nath Kovind, da yoh u yei dawai yada COVID-19 ha Army R&R Hospital, Delhi.
