U Montri ka chnat bordiñ ka jylla, u James PK Sangma da ong u wa katni ka jylla Meghalaya duna ko hadooh kamwa 25 hadooh 30 percent i yoh bordiñ wei ini da pynman i wa hap pyndooh bordiñ hadooh 6 kynta, heiwa da ong u leh wa ka sorkar da pyrchang ko wow pynduna ya ini i pyndooh bordiñ.
Ynnin ka sngi u James da yachem u ya u montri ka sorkar pyrdi wa pait ya ka chnat Power Ministry, u RK Singh, heiwa da pyntip u yei man i long hapoh jylla heiyatoh wa i pyndooh bordiñ wei wa ka jylla da yoh ko ya ka Atmanirbhar Loan T. 1345 klur neibynta wow su cha waroh ki Company wa kynthup ya ka NTPC.
Da ong u wa da kyrpaad ya u montri wow yarap ya ka jylla khamtam wa da toh i por wa ki khynnah pynkhreh ki wow yaleh Exam wei neiliang uni u montri da kular u wow yarap ya ka jylla.
Hajrong i embor ka National Thermal Power Corporation wow khang ya ka bordiñ cha ka jylla, u montri da ong u wa ka sorkar India da pynmih ko ya ka hukum ha u snem 2019, heiwa i pynbait ya ki kaam bordiñ ha ka thaaiñ mihsngi da ekti ha ka North East Region Load Despatch Centre (NERLDC) da kiwa pynmih bordiñ heiwa daw e bordiñ du hadien wa yoh ya ka Letter of Credit (LC). Da ong u wa neidaw wa ka LC da khate ya ka ha u Thohlakhmi wei ka sorkar hap leh biang ko ya ka Letter of Credit wa thymme ka wow man neibynta 6 bnai ha i lut wa T.18.5 klur chi bnai.
Hajrong ka soskular wa da soi ha u snem 2007 wow thied bordiñ na ka Bongoigoan Thermal Power Station, u James da ong u wa i dor yong ka bordiñ da man i palat T. 6 chi unit, wei ka sorkar jylla ymjoh bor de ko ha ini i dor deiwa pynrap leh wa ym du ha ka jylla wa chem chitom na ka ‘Fix Charge’ kawa hap su bait cha ka NTPC.
