Uwa yahkhmat ka Congress Legislature Party (CLP), u Dr. Mukul Sangma da ong u wa man i iwa eh wow pyndap yeiwa ieh ki MLA ka Party wa da khlaad wei neiliang ka Congress daw kyruiñ biang ko cha ki paidbah wow sai kyrtong ha ki Constituency wa da dooh ya u MLA.
Da ong u wa ka Party daw yakhun ko ha ka Election chiteiñ samoi, wei da kyrmen skem u wa ki paidbah daw jied biang ki ya ka Congress ha ka Election deiwa pait yei man i long ha ka jylla.
U Dr. Mukul da ong u wa i yaklam hapoh ka Party dang lai i chaphrang heiwa kammon wow pyndap biang yei thaw wa da dooh MLA ko.
Kam wow kdaw heini, ka Congress kawa jop 20 ngut ki MLA ha ka yung dorbar chna aiñ ha u snem 2018, katni da hiar i em MLA ko cha ka 17 ngut hadien wa khlaad ki 3 ngut ki MLA ka Party, wa kynthup ya u Clement R Marak na Salsela uwa da khlaad ha u 2018, wei ka Congress da rem noh ko ha ka By-Election ha katai ka Constituency ha ka kyrtong ka NPP, ka Ferlyn C A Sangma.
Hadien ini da dooh ko sa 2 ngut ki MLA neidaw wa khlaad syndet ki, wei kini kynthup ki ya u David Nongrum na Mawryngkneng ha ka 2 Thohlakhmi wa u Dr Azad Zaman u MLA ka Rajabala uwa da khlaad ynnin ka sngi.
