Ka JSU War Jaiñtia Circle ha ka 5 tarik uni u bnai da booh ujor ko ha u Inspector General ka BSF Meghalaya Frontier pyrchah ya ki shipai ka BSF Muktapur BOP lyngba ka chithi na u Eddy Kery Pohtam, President ka seiñ hadien wa boon na kiwa chong chnong ka Muktapur da ood da naam ki yei leh heh kini ki chipai hapoh chnong heiwa ini wa dep haka 1 tarik uni u bnai, ki chipai BSF da siat ki cha suiñ yow pyntieñ bru hapoh ka chnong Muktapur iwa da pynsyier ya kiwa chong chnong.
“Ini i leh embor ki chipai hapoh Muktapur da pynman ko ya kiwa chong chnong wa kiwa em chajan wow tieñ ya ki chipai ha ki chnong ki thaw wa em ki kamjooh da dooh yei chaniah ya ki pulit chipai ka sorkar pyrdi kiwa da booh wow em ha kiwa boon ki laad luti iwa da pynthut yei lai i wan ki kari kamjooh wow pyndep yei kaam yong ki bru wa man-ka-sngi,” da ong u Eddy Kery Pohtam.
Ka JSU da dawa ko wa ki BSF toh u leh ki yei kaam yong ki ha khappood neibhah wa em boon i leh thombor da ki nong Bangladesh kiwa myllien wow tooh wow pynsih ya ki kwai wa i rep i riang kamjooh wow khloh moo khlem da pynwit næ chah pynshitom ha ki BSF.
Ka JSU da dawa ko leh wow pyndam noh syndon ya ki chipai BSF kiwa yieñ ha ki sarok wa lai kiwa chong chnong khnang wow em i chngaaiñ hapoh chnong yow lait leh u em i jia wa sñiawsih.
(Feature Image- For Representational Purpose Only)
