Haka yalap Election u Prime Minister Narendra Modi ha Brigade Parade Ground, Kolkata ynne ka sngi, uwa ak phlim wa pawnaam ka West Bengal u Mithun Chakraborty da psiah u cha Bharatiya Janata Party (BJP).
Ini da leh chwa wow sdang ka Election MLA ka West Bengal kawa daw sdang haka 27 tarik uni u bnai.
Ha chwa ini da em ki khubor wa da ong wa u Mithun Chakraborty daw psiah u cha ka BJP yow yarap pynkylla dur yaka Party hapoh ka jylla.
U Mithun hawa e u yei klam da ong u wa toh i thrang mynsien yong oo wow psiah cha ka Party iwa da man sakhiat ynne ka sngi.
“Nga da heh O ha ka dong wa khian ha North Kolkata wa tip kam ka Jorabagan wei da jooh yimphoo O wow man u bru wa pawnaam ha iyi re iyi tangwa ym jooh em poi pyrkhat O wow em haka jooh ka rynsan wa ki bru wa khlanbor dooh hapoh ka ri wa kynthup ya u Prime Minister Narendra Modi,” da ong u Chakraborty.
“Nga toh u Bengali, wei nga ngait O wa waroh kiwa da heh da san heini em ki yei yoh ya i khyndaw,” da ong u Chakraborty heipor wa beiñ yaka Trinamool Congress wa khut ya ka BJP kam kiwa na baar.
“Nga kular O wow yaleh neibynta i hok yong waroh kiwa chong chnong ka West Bengal,” da ong chooh chooh u.
Ya u Mithun uwa da em katni 70 snem da pdiang sñiawbha ya oo da u National General Secretary u Kailash Vijayvargiya, u Dilip Ghosh, Chief Whip wa kiwi kiwi.
