Ka Sarot I Man, kawi na ki kynhun napoh ka chnong Jowai, ynne ka 7 tarik da lai e yarap ko cha ki yung wadooh waduk wa em ha ka chnong Umlangshor, Mukhla hapoh West Jaiñtia Hills District. U Waheh Chnong yong ka chnong da pdiang burom u ya ki dkhot yong ka kynhun hachwa wow sdang i e sñiawbha deiwa ekti won ha u Kyllimot Lhuid u dkhot yong ka Sarot I Man wow pynlai ya ka yalang.
Ha katai ka yalang da sdang nyngkong deiwa yoh yei ngoohblai na u Barlee Moore Shilla, pynbood ya i klam na u Riquoma Rq. Laloo, neitæ won na u Jaitda Oo Sumer kiwa man ki dkhot yong ka kynhun neitæ yoh won yei klam neiliang ka chnong na u Tiplem Sumer heiwa ya ki kyntien e khublei da e da u Aziz War uwa man hi u dkhot yong ka kynhun.
Hei klam u Riquoma, da ong u wa kani ka kynhun da sdang ya ka da ki 12 ngut ki chi lok kiwa em i jooh i thmu neibynta i miat i bha ha ka imlang sahlang. Kani ymtoh ka seiñ wa yatoh wa kawon kawon ka seiñ saiñ pyrthai, em ko i thmu wa hakhmat dooh hei wow yarap ya kiwa dooh waduk cha ki thaiñ nongkyndong. Da ong u leh wa ya kani ka kynhun da sdang ya ka nadooh ka 16-12-2020, heiwa da ya pyrkhat kammon u sdang yei kaam wa khian yow pynyoo cha ka imlang sahlang yeitæ i mynsien yong ki dkhot. Kamtæ da mih i yumut wow pynlang ya ki sula ki that na ki yung ki sem yong ki dkhot, kiwa ym em de u pynemkaam tangwa ym hoi u e da kiwa dasih, toh u e da kiwa bha. Da khana haroh u wa da yaklam ya u Waheh Chnong, Umlangshor, u Cherterfield Lyngdoh lyngba u Kyllimot wa u Tiplem Sumer.
U Jaitda Oo Sumer da klam u chaphang i kordor yong i chait i khiah hei im yong i ki bru, deiwa man kiwa lehkhooid wei wow pynneh pynsah ya ki dieñ ki siej, i thung i tep, ka um wa kiwi kiwi ki jait im wa em ha ka Bei Rym-aw. Neibhah na kini, ye i u yoh ya ka la-ær kawa bha, heiwa da kyntu haroh u ya kiwa chong chnong wymhoi u thang pathar ya ki khloo ki kjam kiwa ye u pyndooh jait ya ki dieñ khian yow heh ki. Da kyntu haroh u ya ki manpa wow man ki bru kiwa tip ya ka yung ka sem, ki khon ki kti; ymtoh u man hi-eh kiwa dih wa pynsih ya ka yung heijooh i por wa ktah ya ka imlang sahlang.
Hei klam won u Tiplem, da pynsñiaw u yei kmen hadooh kattæ kattæ ya kani ka seiñ, heiwa da jied nyngkong dooh ko wow li e yarap cha ka chnong yong oo. Da pynsñiaw u yei sñiawngooh ya kiwa chong chnong kiwa da wan li chim yeini i e sñiawbha. Da e u yei kyrkhu kyrdoh ya waroh ki dkhot ka kynhun yow man ki kiwa ye u kreh chooh chooh ha kiwon kiwon ki thmu wa bha yong ki nadooh ki kaam yonglang hadooh ki kaam samen.
Ha chwa wow pynkut ya ka yalang, da em i yachondur lang waroh kiwa wan chiruplang u Waheh Chnong wa kiwa krehkaam chnong ka chnong Umlangshor. Hadien neitæ u Chairman da pynwai u ya ka yalang deptæ saam yei e sñiawbha deiwa sdang u e da u Waheh Chnong, Umlangshor deptæ pynbood sa kiwi.
