I dawa pynku kyrdan ya ka Laskein C&RD Block cha ka Civil Sub-Division ynne ka sngi da poi biang i ha ka Yung Dorbar Chna Aiñ heiwa u MLA ka Mowkaiaw, u Nujorki Sungoh da rah biang u ya ini i kaam iwa da sahteiñ kattu da boon boon snem.
U Nujorki da khana u ha ka yung dorbar wa ka yalang paidbah wa nyngkong dooh hajrong ini i kaam toh ha u snem 1991 heiwa da jied leh ya i thaw i wow e mynkna wow chna ya kani ka Sub-Division.
Chooh chooh da ong u wa ki MLA warim ka thaaiñ nadooh u pa u yong oo, u M Suchiang ha u snem 1993, 1997 wa 2007 wa u EC Bamon ha u 2012 da yaklam ki ya ini ha ka yung dorbar ka jylla tangwa hadooh katni ympu em u pynku kyrdan ya ka.
Da ong u wa ya kani ka Block da chna nadooh u 1973 wei katni em ko 87 tylli ki chnong tangwa em du kawi donhi ka Community College ha Shangpumg kawa jngai bha na kiwi ki chnong wei em leh du 6 tylli donhi ki Higher Secondary School, 33 tylli ki Secondary School wa 75 tylli ki Upper Primary School wei ini da ktah bha i ya i puræ puthi ki khynnah.
U Nujorki da ong u wa 85% ki paidbah hapoh ka Block im ki nei rep katwa kamtæ da toh i por wow pynku kyrdan ya ka.
Da ong u leh wa hapoh ka Block em kawi ka CHC, 5 tylli ki PHC wa 14 tylli ki Sub Center deiwa pynrap wa da toh i por wow pynku kyrdan noh leh ya ki Sub Center ha Psiar wa Thadbamon cha ki PHC khnang wow ye ki u e chakri ya ki bru khappood ka jylla wei kamjooh leh ya kiwa em ha Nartiang wa Raliang Constituency.
Heijooh i por da kdaw u yei emkaam wow chna noh ya u sarok Khatkasla Moojem Jrikyndeng neibhah uni u sarok daw yarap u wow pynku yei khayi pateiñ ki bru ka thaaiñ neibhah katkam wa man katni toh ya uni u sarok da ye u pynemkaam du heipor tlang, wei boonsien ki kari sah ki neidaw wa sih ware uni u sarok wei deiwa em u sarok, ki bor pulit leh daw suk ki wow yaleh pyrchah ya ki kaam damok.
Hajrong ini waroh neiliang u Lahkmen Rymbui uwa man u montri ka chnat Community And Rural Development da ong wa da yoh chiboon ki dorkhat hajrong ini wei daw chong pyrkhat yeini i kaam liang wanang khnang wow ye u leh yeiwa emkaam hadien wa pynchongnia bha waroh.
Heiyatoh wa ini i pyntip u Lehkmen, neiliang u Nujorki da kyntu u ya u montri wow chimkhia wow yaklam noh ya ini i kaam wa da sahteiñ.
