U Montri wa pait ya ki kaam pohyung ka jylla, u Lahkmen Rymbui da ong u wa em hadooh 2228 tylli ki kreh pulit kiwa lait ha ki kyrdan waphær waphær, wei ya kini ki kreh ka chnat daw pynman noh ko ya ki Interview ha uni u snem.
Yeini da ong u hawa jubab yeiwa kylli u MLA ka Congress na Mawlai, u PT Sawkmie hapoh ka yung dorbar heiwa neiliang u Rymbui da pyntip u wa ka Meghalaya Public Service Commission (MPSC) da pynbna paidbah ko wa ki kreh wa lait ha ka chnat toh ha ka kyrdan MPS nadooh ka 2 tarik Naisaphra 2019, katwa ka Central Recruitment Board da pynbna paidbah ko ya i kreh wa lait nadooh ka 12 tarik Khonchonglad 2019, tangwa hadooh katni ympu yoh u pyndap ya ki nei wan ka khlam COVID-19 ha u snem wa dadep.
U Montri da ong u wa hei sakhiat ya ki Exam wa ki Interview neibynta kini ki kreh da sdang nadooh u Wisu wa Naitung u snem wa dadep tangwa nei wan ka khlam da pynsangeh noh wei katni ka sorkar da ebor ko wow pynman noh ya ki Test wa ki Exam neibynta wow pyndap noh ya ki kaam wa lait ha uni hi u snem.
