U MLA ka BJP, u Sanbor Shullai da lai yachem u ya u Rakesh Kumar Verma uwa man u Union Secretary, Ministry of Tourism ka sorkar pyrdi wow paan yarap na ka Ministry heiyatoh wa ki kaam uiñke suwari hapoh ka jylla.
Neiliang u Sanbor da ekti u ya ka chithi cha u montri ka chnat Tourism wow pynlait ya ka 2nd Installment yong ka Development of Northeast Circuit wa pynkrehkaam da ka MTDC Ltd. wei da kyntu leh wow pynlait noh ya ka poisa yong ka Development of Spiritual Circuit kawa man T. 73.50 klur.
Neiliang u Secretary ka Tourism da kular u wow pynsmat u pynlait noh ya kani ka poisa hadien wa pynkylla ya ki kattu katni ki bynta yong ki kyndon yong ka.
U Sanbor da khana u leh ya ki myntoi wa yoh ka jylla na ki kaam uiñke suwari heiwa boon ki khynroo da yoh yarap ki na ka Swadesh Scheme wei waroh ki Utilisation Certificate leh da ekti ka MTDC Ltd.
Heijooh i por da kyrpaad u leh ya u Union Secretary ka Tourism wow kyrchaan ya ka jylla deiwa pynlait poisa neibynta ka 20 Years Vision Document wow sdang da ka MTDC Ltd.
Da kyntu u leh yei krehlang ka sorkar jylla wa ka chnat ka sorkar pyrdi wow pynchlur yei wan sdang seiñ kreh ki bru hapoh ka jylla.
Neiliang u Sanbor da yachem u leh ya u sahep ka Ministry of Tribal Affairs heiwa da ekti u ya ka dorkhat cha u montri ka chnat Tribal Affairs u Arjun Munda wow pynlait poisa wow pynman ya ka Pinewood kam ka Heritage Hotel wow ye chooh ki khynroo khyllood u yoh kreh ki.
Heijooh i por u Sanbor da ban joor u leh yei emkaam wow pynku ya ki kaam uiñke suwari ha ka jylla neibhah da ki lak ngut wow yoh myntoi neini i bynta.
