U Montri ki kaam Pohyung ka jylla, u Lahkmen Rymbui da pyntip u wa ka sorkar thmu ko wow booh kawi ka Police Station ha Barato, wa kawi ka Fire Service Station hapoh ka Laskeiñ Block, wei katni ka sorkar dang bichaar bniah bha ko yeini.
Neiliang u MLA ka Mowkaiaw, u Nujorki Sungoh hawa wanrah yei kylli ha yung dorbar chna aiñ ka jylla, da ong u wa ki paidbah ka Barato chem chitom bha ki neibhah wa hap ki hapoh i pait ka Nartiang Police Station kawa jngai kamwa 46 Km.
Da ong u wa heipor wa dadep da em i dawa na ka chnat puræ puthi wow booh kawi ka Examination Centre ha Barato, tangwa neidaw wym em ka Police Station wa ka Bank ym ye u leh yeitæ katwa kamtæ ki khynnah ka thaaiñ chem chitom bha ki neibhah wa hap lai thoh ki ya ki Exam SSLC chadooh Mookyndeng kawa jngai kamwa 30 Km na Barato, katwa em leh ki khynnah kiwa hap lai thoh Exam cha Shangpung kawa jngai kamwa 35 Km wei na Shiliangmyntang cha Jowai toh 37 Km.
U Nujorki da ong u leh wa i wym em ka Fire Service Station ha ka thaaiñ da wanrah ko yei dooh myntoi wa khroo neibhah wa lada emkaam jhan ya ki kari tympleh diñ, hap wan ki nadooh na Jowai wei chimpor ki hadooh kamwa 2 kynta tam wei ini man i iwa eh wow tympleh yei diñ hapoh i por wa biang.
Hawa jubab chooh chooh yeiwa kylli, u Lahkmen da pyntip u wa ka sorkar da yoh thaw ko wow chna ya ka Fire Service Station ha Raliang, wa da e sñiawbha da ka chnong.
