Ka Khasi Students’ Union Moopyut Unit hapoh i yahkhmat u President yong ka, u Stanly Dkhar wa u Secretary, u Yophi Khyriem hei emlang kiwa kitkaam ka War Jaiñtia Circle, u President u Laitphar Syngkrem, General Secretary u Lurman B. Talang wa u Publicity Secretary u Michel Platini Mukhim ha ka 8 tarik uni u bnai da lai ujor ki ha u Deputy Commissioner ka West Jaiñtia Hills District hajrong i thaw noh-jhep iwa em ha Mynkjai iwa da ktah joor bha neidaw wa i sma tung iwa da poi chadooh cha chnong wa marjan.
Ka seiñ da ong ko wa waroh ki kari kit jhep da noh khiar ki yei jhep ha tymbud sarok khlem em iwon iwon i pait i yoo wow leh deiwa biang.
Chooh chooh i tdem wa i sma da wanrah i yei chitom ya ki paidbah wow riñ mynsien ki iwa da ktah yei chait i khiah ki paidbah.
Neiliang ka seiñ da maham ko wa lada ki bor wa pait yeini ym leh ki yeiwa emkaam, neiliang ka seiñ daw lai khang noh ko ya i thaw noh-jhep iwa em ha Mynkjai.
Hadien i yachem, neiliang u Deputy Commissioner da ong u wa daw chimkhia u yeini wei daw leh yeiwa emkaam pyn ha ki sngi wow wan.
