U Montri ka chnat bordiñ ka jylla u James Sangma da pyntip u ynne ka sngi wa ka National Thermal Power Corporation Limited (NTPC) da pyndam ko yei kyndon pynduna e bordiñ cha ka Meghalaya.
U James da pyntip u wa haka 3 tarik uni u bnai da dep u wow yachem wa u Power Minister ka sorkar pyrdi u Raj Kumar Singh heiyatoh wa i chah pynduna pynpoi bordiñ da ka NERLDC cha ka jylla heiwa da kular u leh wa ka bai bordiñ kawa dang sah u su noh lyngba ka ram wa T. 1345 klur wa yoh naka Atma Nirbar Bharat Scheme heiwa na kani T. 100 klur u su chwa cha ka NTPC naka bhah wa nyngkong wa yoh kawa T. 630 klur.
Kam wow pynkynmoo wa haka 2 tarik uni u bnai ka sorkar da hap biang ko wow pynbna yei pyndooh bordiñ wa 6 kynta chi sngi hadien waka poisa wa da su ko cha ka NTPC da chah khatæ ko neidaw wa em ki warim kiwa dang sah, kamtæ da hap pynthymme biang yei su deiwa chna biang yaka Letter of Credit.
