Ki ar tylli ki seiñ bhalang wa kynthup ya ka Jaiñtia Youth Federation (JYF-EJH) wa ka Hynniewtrep Youth Council (HYC-EJC) hapoh i yahkhmat u John Pala, President ka JYF-EJH wa u Priouse Pale, President ka HYC-EJC da e dorkhat ki ha u Executive Engineer ka MePDCL, Khliehriat Distribution Division ha ka 08-03-21 heiyatoh wa i dooh bordiñ ka chnong Suchen la kamwa 8-9 snem kattu.
Ynnin ka 10 tarik chirup wa ki sahep ka MePDCL Distribution Division Khliehriat da lai pait ki ya ka chnong Suchen heiyatoh wa i dooh bordiñ wa kamjooh heiyatoh wa ka Schem Pradhan Mantri Sahaj Bijli Har Ghar Yojana (Saubhagya).
Kani ka Scheme toh wow pynpoi bordiñ ha man la ki thlu yung wei ha kani ka sngi da emlang leh kiwa kitkaam ka chnong wei da em ka yalang wa tbian heiwa da yaklam hajrong ki chrot bordiñ, ki Transformer hadooh i pyndait bordiñ cha yung ki bru kiwa em 150 tylli ki manyung.
Neiliang ki sahep da kular ki wow pyndep ya ki kaam waroh hapoh kani ka tayaw wow pynpoi bordiñ cha waroh ki manyung ka chnong.
