Uwa yahkhmat ka liang pyrchah, u Dr. Mukul Sangma ynne ka sngi da ong u wa u Montri Rangbah u Conrad Sangma ym em puræ bha u yaka soskular wa da soi ha u snem 2007 da ka sorkar Congress waka NTPC.
“Da dep u Montri Rangbah wow puræ kawi pa kawi ka sla? Ym em puræ u,” da ong u Dr. Sangma hapoh ka yung dorbar hawa yaklam hajrong i saam bordiñ hapoh Meghalaya”.
Uwa yahkhmat ka liang pyrchah da kylli u leh wa cheiwon ka T. 11 klur wa hap u su ka MeECL cha ka NTPC katkam wa ong u Montri Rangbah ini wa dep.
“Ileh yah bakla u Montri Rangbah yaka yung dorbar?” da pynche u deiwa pynrap wa ka soskular wa da ya soi haka 13-07-2007 toh hadien wa yaklam wa jrong bha da ki jylla ka thaaiñ mihsngi waka sorkar India wa yatoh waka North Eastern Region Power Committee (NERPC) katkam ka aiñ Electricity Act, 2003.
Da ong u wa ka soskular wa yasoi ha u snem 2007 ym toh kawa phær wei kawa da mynjur daka sorkar India iwa da soi leh da kiwi ki jylla ym toh du ka Meghalaya.
U Mukul da ong u leh wa lada kani ka soskular toh kawa ym hoi, ileh won ka sorkar kawa bood kawa da wan ha u snem 2008 kawa ym toh ka yong ka Congress ym em pyndam ki ka heiwa kani ka sorkar kawa nadooh u 2008-09 da pyndam ko ya kiwi ki soskular kiwa bha kiwa da soi heipor wa em ka Congress hei bor.
Da ong u leh wa em ka kyndon kawa ong wa i bordiñ wa da booh, lada ki jylla kiwa jied wow dam u chim yei bhah bordiñ, daw e cha kiwi kiwa emkaam bordiñ.
Kamtæ da ong u wa ini i pynbait e bordiñ mut ko wa ym ye wow taan bordiñ chiboon tangwa hap wow su yei dor wa booh (Fixed Charge).
Tangwa ym em booh dor ya kani ka Fixed Rate haka soskular.
Hawa e yei jubab, u montri ka chnat bordiñ u James Sangma da ong u wa u Dr. Sangma da mynjur u yaka soskular wei da yoh leh yaka muhor mynjur heipor wa man montri u.
U James da kdaw u leh yaka Clause 11 kani ka soskular kawa ong wa nadooh wa krehkaam ka soskular, daw krehkaam ko 25 snem, itæ nadooh wa sdang u krehkaam ka khadooh ka Station, lait noh wa da mynjur wow pynyinsur chooh chooh yaki kyndon wa da ya mynjur.
U James da jubab kylla u leh ya u Dr. Sangma deiwa ong wa lada oo leh puræ u næ ym em yaka soskular chwa wow soi yaka.
Chooh chooh u James da ong u wa ka Station wa khaddooh da krehkaam ko nadooh u 2019 iwa mut wa ka soskular u krehkaam ko hadooh u snem 2044.
“Ym sñiawthooh O yei rukom pyrkhat ka sorkar ha itu i por wow kdooh u khoom ya i ha ini i por iwa da wanrah yei lutsan yaka jylla,” da ong chooh u.
Da kdaw u leh wa ka soskular wow thied bordiñ kawa tip kam ka Power Purchase Agreement (PPA) toh kiwa jooh yasoi 5 hadooh 10 snem.
“Ym em kam kitæ ki kyndon wa jooh bood wow ong wa ka PPA toh u man ko 25 snem nadooh wa krehkaam ka Station wa khaddooh,” da ong u James.
