U Montri ka chnat bordiñ ka jylla u James Sangma da ong u wa ka ram wa chim naka ADB yow pynkrehkaam yaki Smart Meter toh kawa chim daka sorkar India heiwa 20% naka toh kawa hap bahkhlieh daka jylla wei yeini da ong u hawa jubab yei phah pynsangeh chwa wow pynkrehkaam yaki Smart Meter kat wym pu che ki paidbah yei krehkaam ki kamjooh leh neidaw wa syad dor ki.
Da khana u leh wa ka sorkar wa katni, nadooh u 2018 da em 3,23,364 tylli ki manyung wa thymme kiwa da chim bordiñ naka MeECL heiwa nadooh 2010 hadooh u 2018 da em 1,07,910 tylli ki manyung thymme kiwa pyndait bordiñ.
Da pynche u leh yeiwa ong wa i dor ki Smart Meter ha kiwi ki jylla ka thaaiñ mihsngi toh du kamwa T. 3000 katwa hapoh ka jylla toh palat T. 9000, da ong u wa ini toh iwa bakla heiwa hapoh ka jylla chongdor ki T. 3400 uwi.
Heiyatoh won wa ki thaw wow pyndait yaki Smart Meter, da ong u wa da jied yaki thaw wa dooh nong ka chnat wei kini ki thaw toh kiwa boon ha ki thaaiñ nongkyndong.
