Kam i dak wow lehkmen yeiwa daw dap 75 snem i man laitlooid ka India, da pynman ya ka pynyoo rong ya ki dur wa san sngi hajrong ka phang “Azadi Ka Amrut Mahotsav” kawa wan wai da u Lat ka Meghalaya u Satya Pal Malik hei emlang u Director DDK, Shillong kam uwa symbood kongsan.
Kawa pynman daka Regional Outreach Bureau, Shillong hapoh ka Ministry of Information and Broadcasting, ka sorkar India, kani ka pynyoo rong namo ka Exhibition man ko leh heijooh i por wa sdang u Prime Minister Narendra Modi ya ini i lehkmen yow pynkynmoo ya kiwa chong chnong yei kordor i yoh yei laitlooid wa iwa da hap wow dooh yow yoh ya ini da kiwa yaleh yei laitlooid yow pynskem yei mynried ka ri.
Hawa e yei klam, neiliang u Lat da ong u wa ynne ka 12 tarik leh man ko ka lyngkhooh snem ka Dandi March kamjooh i sdang yaka “Azadi Ka Amrut Mahotsav” hapoh ka ri da u Prime Minister Narendra Modi uwa da kaweh lama leh yei pynwandur biang yaka Dandi March na Sabarmati Ashram. Kani ka March daw kut ko haka 05-04-21.
U Lat da yaroh u leh yeiwa booh ya ki dur kiwa pynyoo ya ki khynroo ya kiwa embynta wow yaleh yow yoh laitlooid kam u Mahatma Gandhi, Vallabhbhai Patel wa u Netaji Subash Chandra Bose, deiwa kyrmen wa ini daw e mynsien ki ya kiwa dang khynroo.
Kam chibynta ka Amrit Mahotsav, daw pynman ya kiwa boon ki jait kawa man leh 75 tayaw hadooh wa poi ka sngi laitlooid ka ri haka 15 tarik u Naisaphra.
U Lat da saam u leh yaki khusnaam cha kiwa jop ha ki yakob wa boon jait ha kani ka sngi.
