Hawa e yei jubab hapoh ka yung dorbar ynne ka sngi yaka phang wa wanrah daka MLA ka liang pyrchah ka Dr. Mazel Ampareen Lyngdoh kawa da kylli hajrong i e dawai yada COVID-19 hapoh ka jylla, neiliang u Montri ka chnat i chait i khiah u AL Hek da ong u wa kiwa yoh ya uni u khñiang hapoh ka jylla hadooh ka 9 tarik uni u bnai da em ki 13,977 ngut katwa kiwa chait da em ki 13,815 ngut iwa man wa la 99% toh kiwa da chait katwa kiwa dang chah ktah da em ki 20 ngut wei da dep e yei dawai yada la 60,000 sien.
Da pyntip u leh wa hapoh ka jylla da em 311 tylli ki COVID Vaccination Centres iwa daw pynku cha ka 450 tylli ha kini ki sngi wow wan heiwa yei e dawai tika da leh leh ha ki 14 tylli ki thaw sumaar ki bru samen ha ki 5 tylli ki District.
Nyngkong da pyntip u wa da em ka thong wow e dawai chwa ya ki 29,929 ngut ki wakreh ha ki kaam sumaar sukhhær wei hadooh ka 11 tarik uni u bnai da yoh 19,186 ngut na kini ya ini i dawai iwa man 64%. Deilang won wa kiwi kiwa em hakhmat wow yaleh pyrchah namo ki Front Line Workers, da em ki 26,593 ngut kiwa da yoh ya ini i dawai.
Da ong u leh wa ya ini i dawai ym pu hoi wow e ya kiwa dang punkhon lane kiwa dang e bu khon.
Da pyntip u leh wa ya kiwa em 60 snem chaneiñ wa kiwa em 45 snem hadooh 59 snem kiwa em chwa yei chitom da sdang wow e dawai yada nadooh ka 1 tarik uni u bnai heiwa ha ki thaw sumaar sorkar toh iwa e dei mynkna katwa ha ki thaw yong ki bru sorkar hap wow su T. 250 chisein Inject heiwa ka sien wa ar toh kawa e hadien 28 sngi.
Chooh chooh da pyntip u leh wa em 191 tylli ki thaw yow pyndait-thah ya ini i dawai kiwa em ha ki 170 tylli ki thaw wei da dep wow leh ya kiwa boon ki pynsñiawthooh paidbah hajrong ini i e dawai lyngba ki Social Media, TV wa Radio wei kamjooh deiwa pynman ya ki pynsñiawthooh paidbah deiwa yachem wa ki paidbah.
