I ku dor syndet i doh masi ha ka jylla da T. 50 ya i doh wa khleh wa i chyieñ wa T. 100 i doh pasoh, da wanrah yei lyngngoh wa khroo ya ki paidbah khamtam ha ka jylla Meghalaya kawa khlan bha wow baam doh.
Kam wow kdaw heini wa kiwa dai doh wa kiwa choh doh masi da pynku ki yei dor doh nadooh ka 10 tarik uni u bnai, na T. 400 chi kilo cha ka T. 450 i doh wa khlehlang wa i chyieñ, katwa ya i doh pasoh da pynku na ka T. 500 cha ka T. 600 tyngka, heiwa da em leh i pynbaad wa kamwa 95% ki masi wa thmu wow chohdoh ha ka jylla da khayi pyrchah yaka aiñ cha Bangladesh.
Hawa pyrchang wow thooh ya i daw tre hajrong ini i pynku syndet ya i dor i doh masi, da yoh yutip wa ye u man neidaw wa chah khang noh ka yaw masi kawa em ha Khanapara, Ri-Bhoi District hadien wa ujor yong kawi ka seiñ maya mrad ha ka 1 tarik uni u bnai. I chah khang noh nadooh katai ka sngi yaka yaw masi toh hadien wa katai ka kynhun na Delhi kawa tip kam ka ‘Gau Gyan Foundation’ da ujor syndon ko da ka FIR heiwa da kem noh ya ki masi kiwa em ha katai ka yaw kamwa 300 tylli.
I daw yong ka ujor da ka FIR toh hajrong i pynbaad wa da em i khayi tooh ya ka masi na katai ka yaw, wei da chem wa ya ka masi kawa mynsoo ha i lai sylli katai ka kynhun ha ka 28 tarik u bnai wa ar.
Katai ka yaw masi ha Khanapara da pynlai da ka Hima Mylliem, kawa da yoh bor leh na ka sorkar waka KHADC, wei toh lyngba katai ka yaw da pynpoi ya ki masi wow choh doh ha ka jylla.
