U Montri Rangbah ka jylla, u Conrad Kongal Sangma da ong u wa ym em i liat ka la-ær bih na ki top pynlang tngit wa mih na u Uranium kiwa em ha Nongbah Jynrin ha South West Khasi Hills (SWKH).
Hawa pynche hajrong i yatai wa da wanrah da ka MLA yong ka East Shillong, ka Dr. M. Ampareen Lyngdoh ha ka ‘Short Duration Discussion’ hapoh ka yung dorbar, u Conrad da ong u wa katkam ka Report wa thooh bniah da ki stat na NEHU, ym em leh i pdung yong ki top pynlang Uranium ha katai ka thaaiñ kamwa da pynbaad.
Da ong u wa katkam ka Report wa ka sorkar da yoh ko, da em du ar tylli ki thlu kiwa da booh khnang ha ka top, tangwa ym em itæ i lait ka la-ær bih.
Da pyntip u wa hadien wa da yoo ha ki laad pathai khubor wa em i pdung ki top tngit Uranium, neiliang u Superintendent of Police (SP) ka SWKH da phah u wut wut ya ki pulit ha ka 22 Naikhynde 2020 wow lai pait ya katai ka thaw, wei ha ka sngi kawa bood da lai lang leh da ki bor pynlai District, tangwa ym em iyi iyi kamwa da pynbaad.
U Conrad da pyntip u leh wa ka sorkar da kyrpaad ko leh ya ki stat wa thooh bniah na ka Indian Institute of Technology (IIT), Guwahati wow leh ya i thooh bniah hajrong itai i pynbaad, tangwa neiliang katai ka skurbah hadooh katni ym pu em e ktien ko.
U Montri Rangbah da pyntip u wa ka kynhun yong ki 6 ngut ki stat thooh bniah na NEHU hapoh i yahkhmat u Prof. D Marboh yong ka Dept. of Chemistry da phah ki ya ka Report yong ka lai thooh bniah, heiwa da pynyoo wa ka Radiation ha katai ka thaw ym em i maa, tangwa da ong wa katai ka kynhun da chem ko wa ka Radiation rap khlan ko ha Phud Synkai kawa jngai kamwa 100 phut na i thaw wa em ki top pynlang tngit Uranium, heiwa da pyntip u wa neiliang ka sorkar da phah kow thooh leh yei tre yong i khlan ka Radiation deiwa chim ya ki nongmuna na katai ka thaw yow pait bniah chooh chooh.
