Ka Meghalaya da rem ko da 146 Run haka Vidarbha haka yalehke nyngkong yong ka haka Women’s Senior One Day Trophy wa pynman ha Chennai ynne ka sngi.
Kani toh ka maad nyngkong ka Meghalaya hadien wa ku kyrdan ko cha ka ‘Elite’ Group E ka BCCI Tournament heiwa daw yachem ki wa ki Team ki jylla wa chkeh dooh.
Ynne ka Vidarbha da jop ko yaka kylla khlem wei da jied ko wow Bat nyngkong heiwa kiwa kawang bol ka Meghalaya da leh bha ki kamjooh kiwa yang bol ha madan.
Ka Riticia Nongbet (1/22) da pynhaap ko ya kawa wai yei kamai Run ka S Meshram (lbw) deiwa yoh ko nod naka bol wa kawang nyngkong tangwa hadien ini, ka Vidarbha da pynchkeh ki heiwa ka Vaishnavi Khandkar (54) waka BS Fulmali (72) da kamai ki 127 Run yaka Wicket wa ar.
Tangwa hadien wa haap ki haka Ajima Sangma (1/19) waka Daiaka Warjri (2/24), ka Vidarbha da lai ko na 129/1 cha 196 All Out na ki 47.1 Over.
Kiwi de kiwa kawang bol ka Meghalaya kiwa da yoh Wicket toh ka Ahireeta Mukherjee (2/34), Luiza Tamang (2/39) waka Debasmita Dutta (1/36).
Ka Meghalaya toh kawa tlot daka Bat heiwa ya kiwa boon ki Run da kamai daka Saee Purandare kamwa jooh leh ko nachwa. Tangwa ynne ka sngi won da ye ko wow kamai du 5 Run heiwa da dooh lut ki ya ki Wicket deiwa kamai du 50 Run heiwa ka Tamang da kamai ko 20 Run.
