Ki le tylli ki seiñbhalang na Ri-loom Jaiñtia kiwa kynthup ya ka All Hynniewtrep People United Front (AHPUF), ka Jaiñtia Women Awakening Movement (JWAM) wa ka All Meghalaya People Organization (AMPO) da dawa ki na ki bor pulit ka East Jaiñtia wa ka West Jaiñtia wow chimkhia wow thooh wei wow kem ya ki damok kiwa emkti wow thombor wei wow slaitbor ya ki kynthai khynnah wa kiwa noh ya ki khon.
Kini ki le seiñ da sñiawkhia ki yei ku ki kaam pyrchah aiñ ha Ri-loom Jaiñtia, deiwa kdaw yeiwa jia ya kawi ka khynnah skur kawa na Pamrakmai kawa puræ Class IX ha Wapungskur kawa dang 16 snem, wa i chem ki paidbah ka Ladthadlaboh, Jowai ya i metyap iwi i khonboo kynthai hajan ka yung krehkaam ka Homeguard.
Da pynkynmoo ki wa ha ka 16-12-2020 leh kawi ka khynnah skur ka Tia Chaphrang Higher Secondary School, Sohkymphor da chah slaitbor wei da chah tynyap ko ha ki damok wei hadooh katni ym tip lada ki pulit da yoh kem ki ya ki.
Chooh chooh da ong kini ki seiñ wa i wym ye wow kem ya kini ki damok da pynchlur ko ya kiwi wei da e mynsien leh ya kiwi wow leh ya ki kaam pyrchah aiñ.
Kamtæ da dawa ki na ki pulit wow leh yeiwa emkaam wow kem wei wow pynchitom ya kam kini ki bru.
