Hajrong ka thong yong ka Nasha Mukt Bharat Campaign næ ka Drug Free India Campaign, chimkhia ka chnat krehkaam yong ka Social Welfare, West Jaiñtia Hills District chirup i yakrehlang wa kiwi ki seiñ wow pynman ya ka District Level Awareness Programme wa kyrpang ya ki khon khynroo khyllood.
Ha ka sngi Muchai 13 tarik Wisu ya kani ka Campaign da pynman ha Yungwalieh ka Loompyrdi Iongpiah wei da wan ya chimbynta da ki khon khynroo khyllood wa ki manbei manpa na ki soo tylli ki dong wa kynthup ya ka Chilliangraij, Umchangiar, Loompyrdi Iongpiah wa na Loomkyrwiang.
Chwa wow sdang ya ka yalang wa pynlai u Waiphang Chadap, Society for Urban & Rural Empowerment, West Jaiñtia Hills, da yoh u sñiaw ya ki kyntien na u Alan Niangti, Waheh Chnong Loompyrdi Iongpiah heiwa da ong u man kayi kayi ka khubor wa sñiawsarom chisien pyrkhat neibhah ka West Jaiñtia Hills District man ko kawi na ki District wa da pynhaap hapoh ki 272 tylli nae kawa da tip kam ka Hot Spot Area namo ki thaw wa roi i pynemkaam drugs. Kamtae kani toh man ko kayi kayi ka khubor kawa ki Dorbar Chnong hapoh ka Jowai næ ka District waroh kawi u hap ki u chimkhia wow leh iyi rei yi neibynta i miat i bha ka imlang sahlang wei wow thooh ki laad ki luti hei wow khanglaad næ u pyndoohjait yei em ki bru næ ki khon khynroo khyllood kiwa chahkhoom chakdoh ha i drugs wa kiwi kiwi ki jait dih pynmuaid.
Ka Daka Bareh, Society For Urban & Rural Empowerment, West Jaiñtia Hills kam ka bru chemphang ha ini i kaam da khana ko wa ka sorkar India hadien i chem yong ka wa na ki snem cha ki snem ku i em yong ki bru wa pynemkaam drugs næ ki jait dih pynmuaid, kamtæ ha kani ka sien pyrkhat ko wa toh u leh ki prokram waphær waphær kiwa man ki laad ki luti wow yaleh pyrchah næ u pyndoohjait yei em ki bru wa pynemkaam drugs.
Chooh chooh neibynta i myntoi yong ki bru wa ya chimbynta ha kani ka prokram da batai ko leh chaphang ki jait drugs wa chah daka aiñ wow pynemkaam wei kiwa man pyrchah yaka aiñ, wei kammon ki bru chim ki wow pynemkam ya ki kat hadooh wow man ki kiwa chahkhoom chakdoh ha kini ki jait dih pynmuaid.
Chwa wow poi chawakut yong kani ka prokram, da yoh leh ya ki kyntien khublei na ka D. Lywait, Society For Urban & Rural Empowerment West Jaiñtia Hills District, neiliang u Damehiwot Pde, Waheh Chong ka Chilliangraij yieñ u wow e ki kyntien e mynsien wei kyrsu kyntu leh ya ki bor sorkar wow thoohlad chooh chooh kammon u leh yow ye u pyndoohjait yei em yong ki khon khynroo khyllood kiwa pynemkaam ya kini ki jait dih pynmuaid kiwa nangboon nangroi kat nangmih ki sngi.
