Ka JSU Shangpung Unit haka 12 tarik uni u bnai da lai booh ujor ko ha u DC ka West Jaiñtia Hills District pyrchah ya i thmu wow chna karkhana Coke Factory hadien wa boon na kiwa chong chnong yong ka Shangpung Mynkrem da ood da naam ki ya ini i thmu.
Ha kani ka dorkhat wa da lai e ha u DC, CEM ka JHADC kamjooh ha u SP ka West Jaiñtia Hills, ka seiñ da booh ko yei dawa wow phah pynsangeh ya itai i thmu wei wow chimkhia ya i eh kiwa chong chnong ha kani ka thaaiñ.
Ka seiñ da ong ko wa i thmu wow chna yaka Coke Factory daw wanrah ko chiboon i khtah yaka bei rymaw, yaka la-ær, ki um ki wah, yaka khyndaw, u chyiap, i chait i khiah yong kiwa chong chnong naka la-ær bih wa mih naka.
Da ong leh wa kiwa boon kiwa chong chnong dang boon kiwa im-ja haki kaam rep kamtæ ki leh daw chah ktah ki. Kamjooh leh daw ktah ko ya ka chnong Shangpung hi waroh kawi wei kamjooh yaki chonng kiwa chajan kam ka Raliang, Rtiang wa ka Mynska.
Ka seiñ da beiñ joor ko leh yei leh embor u Waheh Chnong uwa e NOC khlem i pynsñiaw paidbah lane pynman yaka General Meeting hapoh ka chnong deiwa yooh beiñ yei hok ki paidbah wa chong chnong.
Neiliang ka seiñ JSU Shangpung Unit da dawa ko naka sorkar wa ym toh wow e NOC kulmar cha kam kini ki Company khlem da pait (Inspection) chwa ya i thaw kawa ye wow khtah ya ka bei rymaw wei kamjooh ya kiwa chong chnong.
