Ka Khliehriat Block Congress committee (KBCC) lyngba u Working President, u Piwell Shylla da beiñ u ya ki damok kiwa da emkti ha i kaam wow tynyap ya ka khynnah wa dang 16 snem ha Ar Kilo, East Jaiñtia Hills District.
Ka KBCC da pynbaad ko wa i daw wa ku ki kaam pyrchah ya ki kynthai wa ki khynnah toh neidaw wa tlot ware ki bor ka aiñ wei wa ki pulit ym jooh yoh kem ki ya ki damok wa leh ya kam kini ki kaam.
Ka KBCC da dawa ko leh ya ka sorkar jylla wow pynkrehkaam noh da ka Fast Track Court (FTC) ha East Jaiñtia Hills District wow pyndep wei pynsmat ya i bichaar wei wow thung ki bru wow pait kyrpang ya ini i kaam iwa da pynsyir mynsien ya ka imlang sahlang.
Da beiñ u leh ya kiwa mihkhmat ka East Jaiñtia Hills, deiwa kylli cheiwon ki MLA, ki MDC ka District, wei neiyi i daw ym klam ki yeini khnang wow wanrah biang yei chngaaiñ ya ki kynthai khynnah.
Heijooh i por da ong u wa i wym ye u kem ya ki damok wa emkti heini i kaam da pynkha roi ko ya kiwi wow leh ya kam kini ki kaam pyrchah aiñ.
Kamtæ da khut da wer ya waroh ki seiñ, ka imlang sahlang, ki bru paidbah wow yieñ yatylli lang khnang wow ya krehlang pyrchah ya ki kaam wa sih wei wow yaleh katwa ye yow pyndooh jait katwa ye ya kam kini ki kaam wa sih wei yow dawa leh ya ki bor ka aiñ wow chimkhai wow thooh wei wow kem ya ki damok wei ym toh wow e jamin ya ki.
