Ka Meghalaya People’s United Front (MPUF) Shangpung Unit da dap ko dei sñiawkhia wei da beiñ joor ko ya ka Village Water Sanitation Committee (VWSC) kawa da pynskem da ka Dorbar Chnong Shangpung Mission hadien wa yoh yutip lyngba ka RTI hajrong ka Solid Liquid Waste Management (SLWM) heiwa da chem wa u Secretary ka Committee u C. Langstang uwa pynkreh ya ka Scheme ha chnong Shangpung Misssion heiwa da pynkreh khalær ya i kreh.
U D. Iakai uwa man u Vice President da ong u wa hadien wa chem yei leh ka VWSC, ka seiñ da booh chithi ujor ko cha ka yung krehkaam ka PHE Swachh Bharat Mission katwa ka yung krehkaam da e por ko 15 sngi wow pyndep yei kreh lym kamtæ daw pynchitom ko ya ka Committee.
Ka seiñ da kylli ko wa kammon hawa ya ki kaam da dep (file da khang) wei ya ka Bill leh da pynlait lut kammon ka Office da e bui (Report) ko deiwa ong 79% dadep pynkrehkaam wei 21% wym pu dep hawa katkam ka rukom kreh da batai che bha wa ya ka Scheme toh u pynkreh hapoh 60 sngi.
Ha i yachem ya ka EE PHE, RWS Division, Jowai ynne ka sngi hadien wa kut i e por, u General Secretary da kylli u hadien wa da kut i e por yong phi kammon da pynchitom ya ka Committee?
Neliang ka EE da klam che ko wa neiliang ka yung krehkaam yong ka da phah ya ka bui cha u DC hapoh ar næ le sngi wei hadien ka rai u DC daw leh yeiwa emkaam.
Neiliang ka seiñ da epor ko ya chi tayaw wow yang ya i rai u DC.
