Ka High Level Committee (HLC) wa da thung da ka sorkar neibynta wow kyrriah ya ki bru wa chong wa sah ha Harijan Colony, Them Ïewmawlong, ym pu ye ko wow e yaka bui (Report) cha ka sorkar jylla, tangwa daw pyndep chwa ya kiwa emkaam ha ka sien chong yalang wa khaddooh kawa daw pynman noh.
Hawa jubab ya iwa kylli wa wanrah da u MLA ka Congress na West Shillong, u Mahendro Rapsang, neiliang u Symbood Montri Rangba uwa man leh u Chairman ka HLC da pyntip u wa ka HLC da chong ko boontylli ki yalang nadooh wa thung ya ka Committee ha ka 4 tarik u Naiynru 2018. Heiwa da ong u wa lyngba kini ki yalang ka HLC da chem wa em boon ki kynrum kynram wa hap wow leh wei wow pynbait khamtam hawa yatoh wa ka soskular wa da ya soi da ka Hima Mylliem wa ka Shillong Municipal Board hajrong i mantre.
Da ong u wa ka HLC daw hap ko wow bichaar leh hadien wa ka sorkar India da pynbna ko wow pynmiat ya ki bynta ka nongbah Shillong deiwa kynthup ha ka Smart City.
Hawa jubab yeiwa kylli pynrap wa da wanrah da ka MLA na East Shillong, ka Dr. M Ampareen Lyngdoh, neiliang u Montri da pyntip u wa ka HLC da ya syllok ko leh boonsien wa ka KHADC, kamjooh ka Hima Mylliem kiwa toh kiwa pait ya katai ka thaw. Da pyntip leh wa i kaam yong ka HLC toh du wow thooh ya ki laad ki luti wow pynthymme ya katai ka thaw, heiwa yaka Report daw phah cha ka sorkar wow chim ya i rai.
Neiliang u MLA ka North Shillong, u Adelbert Nongrum da kylli u hajrong i wym kynthup lang ka sorkar ya oo ha ka HLC, khamtam wa ka Harijan Colony dang haap ko hapoh ka North Shillong Constituency, deiwa ong leh wa i wym kynthup ye wow em iyi re iyi cha kylla. Da pynsñiaw u leh ya i wym hun hajrong i slem ka HLC wow pynbait ya i kaam, heiwa da pynbaad u leh wa ye u man wa ka sorkar ka mut ko leh ya ini hachwa ka Election 2023.
Hawa pynche ya i klam u MLA, neiliang u Prestone da ong u wa ya ka HLC da thung da ka sorkar, tangwa daw bichaar ya i daw wa ileh wym kynthup ya u MLA, heiwa da pynrap leh wa ym em iyi iyi cha kylla hajrong i wym kynthup lang ya u MLA wa i slem wow phah ya ka Report heiwa da ong wa ini toh iwa sahteiñ da slem chwa tangwa neiliang ka sorkar da yaleh ko wow pynbait noh syndon yanom ya katai ka kaam.