Haka 19 tarik uni u bnai da pynkha yaka seiñ ki manbei na Ri-loom Jaiñtia kawa pyrtuid ka Hynniewtrep Women Welfare & Development Organization (HWWDO) ha yung Community Hall ka Dorbar Chnong Ladthadlaboh, Jowai.
Ha kani ka yalang kawa chongkun chongkhia da ya emlang ka P. Marwein, Officer In-charge ka Jowai Women Police Station kam ka kongsan, u Dolloi ka Elaka Raliang u Chawas Lyngdoh, u Rikut Parein, President warim ka JSU, u Ohibait Dkhar, President KSU-Jaiñtia Hills Unit wa kiwi kiwi ki waheh wasian.
Yaka yalang da pynlai da u Chandame Sungoh, Chairman ka Hynniewtrep Border Disputed Redressal Forum (HBDRF) wei da pynsmai ya kiwa kitkaam, ki Executive Member wa ki dkhot yong kani ka seiñ da ka kongsan ka P. Marwein O/C Jowai Women Police Station.
Da yoh yei kyntien sneiñ kyntien kroo kyntien e bor e mynsien na ka kongsan kawa da pynsñiaw leh yei sñiawkhia yeiwa joor ki kaam thombor yaki khynnah kynthai ha Ri-loom Jaiñtia wa haka jylla hi waroh kawi. Da ong ko leh wa ha ki 3 snem wa em ko hapoh West Jaiñtia Hills District, da chem ko wa em hadooh 4 ngut ki kynthai kiwa pynyap wa noh khon wei pyn 4 ngut na kini ym em wa yoh u kem tang kawi leh, wei i daw wym yoh u kem toh wym em i ya krehlang ki paidbah waki bor yong ka aiñ. Kamtæ da ong ko deiwa em kam kini ki seiñ kynthai kiwa seiñ dei hok dei sakhiat man ko i kyrkhu yaka imlang sahlang kamjooh leh wot yaki pulit deiwa ya krehlang.
Da yoh haroh i klam wa em yumut na u Pa Dolloi ka Elaka Raliang, uwa da ong wa i em kam kini ki seiñ manbei næ seiñ kynthai ki wow mih chakhmat man ko i myntoi wow wanrah yei miat yei bha haka imlang sahlang, ka ri waka jaitbru. Da e u leh ki kyntien kyrkhu kyrdoh, ki kyntien e bor e mynsien wa kani ka seiñ u ku ko chakhmat. Da yoh leh yei klam na u Rikut Parein wa na u Ohibait Dkhar.
Da yoh leh yei klam neiliang yong ka seiñ naka President ka Oibarly Suchiang waka Secretary ka Mayalangki Bareh. Ka President da ong ko wa i mut i thmu yong kani ka seiñ toh wow wanrah yei yatylli ya ryntih hapyrdi ki khon kynthai ka Bri U Ynñiawtrep. Wow yieñ yaleh wow pynyoh yei hok ki khon kynthai. Wow wanrah yei roi yei paar yei chongsuk chongsaiñ hapyrdi ki khon kynthai ka Bri U Ynñiawtrep. Wow chakri yaka imlang sahlang, ka ri waka jaitbru. Neiliang ka Secretary da ong ko wa kani ka seiñ u yaleh ko wow kreh chitom neibynta ki manbei wa kiwa chong wa sah cha ki thaw nyngkyndong.
Hei klam wa tbian neiliang u chongknor da e yaroh u ya kani ka seiñ wada seiñ haka yurim waka rukom kawa hok wa sakhiat wa tip bru tip Blai ym toh kam kiwi ki seiñ kiwa chna tooh, chna rieh hi-eh chapoh kari, cha dukan cha lane mih hi-eh du haki kot khubor. Da beiñ joor u leh ya kam kini ki seiñ thok seiñ chukor kiwa pyndooh burom pynhiar dor yei pyrtuid seiñbhalang wa kam kini toh ki seiñ kiwa dai yaka ri waka jaitbru deiwa chim kabu kam ki seiñbhalang.
Kiwa krehkaam kani ka seiñ wada pynsmai ha kani ka sngi toh kini: President-Oibarly Suchiang, General Secretary- Mayalangki Bareh, Vice President- Emila Nongjngi, Assistant Secretary- Rikynsai Phawa, Finance Secretary- Bynta BD Lyngdoh, Publicity Secretary- Mandakini Suna, Organizing Secretary- Soiling Chyrmang. Da pynsmai haroh yaki 6 ngut ki Executive Members wa 11 ngut ki dkhot.
Yakani ka Wyrta da pyntip daka Oibarly Suchiang, President waka Mayalangki Bareh, General Secretary.
