Ka East Garo Hills da sdang ko yaka U-14 Inter District Tournament wa pynman daka Meghalaya Cricket Association deiwa jop 1 Run yaka Tura ha Mendipathar ynne ka sngi, katwa ka West Khasi Hills da jop ko yei sien wa ar.
Ka EGH da phah yaka wow Bat nyngkong ko hadien wa jop ka Tura yaka kylla khlem deiwa kamai 150/6 na ki 20 Over, heiwa u Priyankshu Das da yoh u 27 Run katwa u Jeristho R Marak da yoh u 25 Run. U Abirim K Marak da ka bol da yoh u 2/15.
Ka Tura da jan yoh ko yei jop deiwa kamai 149/9, deiwa kamai u Agatchu Chitai (39) wa u Abirim (20). U Abririm da yoh u leh yei naam Player-of-the-match yeiwa lehbha u da ka bol waka Bat. U Jeristho wa u Liam Chigarik da yoh ki mar 2/25.
Ha kawi won ka yalehke, ka WKH da Bat nyngkong ko hadien wa jop yaka kylla khlem heiwa da kamai ko 125/8 na ki 20 Over. U Preshanbor Khoksi da kamai boon dooh u deiwa yoh 37 Run katwa u Ananda Berma da yoh u 2/12 yaka South Garo Hills na ki 4 Over.
Yei naam Player-of-the-match da yoh u Damewanpynkhraw Marbaniang uwa da yarap pynhaap lut yaki Wicket ka SGH kawa kamai 83 Run deiwa yoh u 3/15 heiwa ka WKH da jop ko da 42 Run. Ini hadien wa u Ananda da kamai u 22 Run na ki 12 bol.
