Ka Hynñiewtrep Youths’ Council (HYC) Education Cell CEC, da ong ko wa ym sñiaw yahap tang kajiak leh yei pyndooh bordiñ khak khak yong ka chnat bordiñ ka MePDCL iwa da ktah wei pynthut chiboon bha ya kiwa lai puræ kiwa daw yaleh Exam nadooh kiwa yaleh Class 10 wa Class 12 kiwa dang sdang ha u bnai wow wan.
Ka seiñ da ong ko wa ka sorkar jylla daw hap ko wow chim yei bahkhlieh lada jia wa ki khynnah wa kiwa lai puræ ym lait ki ya ki Exam yong ki neidaw wym yoh bordiñ wow khrehkot heipor miet.
Ka seiñ da beiñ joor ko leh hajrong i tkhoh krehkaam ka MePDCL wei yei wym ye u su yaka bai ram wa da ki spah klur tangka ya ka NEEPCO. Deiwa ong leh wa kiwa chong chnong ka jylla kiwa thang bordiñ, ki su bait ki ya i bordiñ man-u-bnai tangwa hap bait ki wow maad ya ini i pyndooh bordiñ man-u-snem kawa da man kam ka tamasa chong hei doom.
Ka seiñ da beiñ joor ko leh yaka sorkar jylla khamtam ya u montri ka chnat bordiñ u wym ye wow leh ya i kaamram wa da pynkit ha oo.
Kamtæ da ong wa lada ym ye u wow leh yei kaam yong oo, toh u e noh u yaka chuki cha kiwi kiwa ye u leh ya ini i kaam.
Ka seiñ da dawa joor ko na u montri rangbah ka jylla u Conrad Sangma wow tuklar u yaklam smat wa ki bor pynlai ka NEEPCO hajrong i ah bordiñ wei wow thooh luti wow pyndooh smat ya ini i pyndooh bordiñ wa 11 kynta ha ka chi sngi ha ka jylla hi waroh kawi.
