Ynne ka sngi ka Joint Action Committe wa kynthup ya ka All Jaiñtia Tourist & Commercial Vehicle Association, MPUF, JYF, JSU, JSM, HYC wa ki wi kiwi ki seiñbhalang kiwa em hapoh Ri Loom Jaiñtia da pynman ki ya ka yalang ha Ynñiawmer hei wow pyrkhat ya i pynkrehkaam ya ka Toll Plaza ha Ialong.
Kani ka yalang da man ko kawa chongchit heiwa kiwa boon kiwa klam da pynsñiaw ki yei pyrchah ya i pynkrehkaam ya kani ka Toll Plaza ha ini i thaw.
U Roming Lamare uwa man u General Secretary ka seiñ ka HYC-JHDU da ong u wa ka seiñ kwah ko wow dawa wow em kawi ka luti kawa ym emkaam u su namo ka Free Lane neibynta kiwa kamai kamwa leh ha ki Toll Plaza ka Ri Bhoi.
Neiliang ka JSM da kdaw ko ya i chah chim kabu ki kari kamai khamtam na thaaiñ Raliang wa Shangpung ha kani ka Toll Plaza kiwa pynemkaam du kattu katni donhi i bynta uni u sarok iwa ym chong yurim. Da ong leh wa lada emkaam wow yaleh pyrchah ya kani ka Toll Plaza wa ka NHAI emkaam wow man ki bru kiwa yatylli wow khang wow pyndooh pyndam yeini i chah thombor i chah lute ki paidbah ka Ri Loom Jaiñtia.
Ka JSU da beiñ joor ko ya ki bru wa ki bor chnong kiwa da e ya ka NOC wow chna ya kani ka Toll Plaza ha ini i thaw paibhah deiwa ong wa kani ka Plaza da thombor wei da lute ko ya kiwa dooh wa duk kiwa lai luti na ka wei emkaam wow pyndooh noh ya kani ka NOC.
U Dapoiwanmi Laloo na ka MPUF da ong u wa i em kani ka Toll Gate da wanrah ko ya i ku ka bai kari ha kiwa boon ki bynta deiwa ong leh wa ini i em ka Toll Gate man ko pyrchah ya ka aiñ kawa ong wa ym hoi u em ka ar tylli ki Toll Gate hapoh 60 Km.
Uwi na ki bru paidbah, u Jomris Rymbai da ong u wa i em kani ka Toll Plaza da pynthut bha ko ya i lai i wan ki paidbah neibhah wa da em i chah jrong-kti ki bru kamjooh leh i chah yoobeiñ i klam beiñ ya kiwa ymye wow su.
Da ong u leh wa kani ka Toll Plaza da man ko kam ka Block I Block II wa ka Langpih kawa wanrah ya i awri awri neipor cheipor.
Kiwi kiwa da klam toh u Rapmiki Pohling, na ka WJNC, u John Pala na ka JYF, u Nabon Ymbon na ka FKJGP, u Tiplang Rymbai na ka AJTDA, u Kyntang Phawa na ka EJHDA wa kiwi kiwi.
Hadien ka yalang ki dkhot ka JAC kamjooh ki paidbah da tia ki cha kani ka Toll Plaza wei da chah khang luti ki ha ki Magistrate kiwa ong wa kani ka yalang ym em yohbor ko na ki bor District wow pynman ya ka wei hadien i yaklam wa chongchit da chah ya kiwa mihkhmat yong kani ka Toll Plaza wow yaklam wa ki Manager kani ka thaw.
Hadien i yaklam da mih ka rai na ka JAC wow epor chi tayaw ya ka NHAI wow wan yaklam wa ka JAC wei da kyntu ya ki paidbah wow su T. 30 kawi ka kari (kari kamai wa ka kari samen) wei ye u pynemkaam ya u sarok katwa ye.
