Ka Chutwakhu ynne ka sngi da yoh ko yei jop ha ka lympung yalehke T20 Open to All Cricket Tournament 2021 wa da pynman daka All Jaintia Cricket Association ha madan Jrisaleiñ, Jowai.
Ya Chutwakhu da yachem ko waka Lion Sports and Youth Affairs heiwa da jop ko da 5 Wicket.
Yaka kylla khlem da jop daka Lion Sports and Youth Affairs wei da jied ko wow Bat nyngkong heiwa da kamai ko 136/7 na ki 20 Over. U Kitboklang Rngad da kamai u 87 Run (15×4 wa 2×6) khlem haap hadoooh wakut, u Jemi Laloo won da ye u kamai 16 Run (2×4), U Armorando Shullai yong ka Chutwakhu da yoh u 2 Wicket na ki 4 Overs.
Ka Chutwakhu da ye ko wow beh ya i thong deiwa kamai 137 Run na ki 16.5 Over deiwa haap ko 5 Wicket. U Heimonmi Nongpluh da kamai u 49 Run (4×4 wa 3×6), u Bhuvnesh Kumar won da kamai u 43 Run (3×4 wa 4×6). U Ebortre Dkhar, u Kitboklang Rngad, u Newson Pyrbot wa u Jemi Laloo yong ka Lion Sports and Youth Affairs da yoh ki u pynhaap mar 1 Wicket samen.
Ka yalehke wa nyngkong mynstep ka sngi (23-03-2021) u man ko ha pyrdi ka Umchangiar wa ka Ummulong heipor 9:00 waje i step, katwa ka yalehke wa bood u man ko hapyrdi ka 4-Mowkaiaw United pyrchah yaka Moodymmai.
