U Lahkmen Rymbui uwa man leh u MLA ka UDP, da ong u wa ka Parliamentary Party yong ka UDP ym tip ko iyi iyi yei dawa wow knieh noh ya ka chnat bordiñ na u MLA ka NPP, u James PK Sangma, deiwa pynrap leh wa katkam ka yutip yong oo, ka UDP ym em yaklam ko iyi iyi harong ini i kaam.
Kam wow kdaw heini wa ynnin ka sngi u General Secretary ka United Democratic Party, u Dr. Jemino Mawthoh da thoh u cha u Montri Rangbah ka jylla, u Conrad Kongal Sangma wow knieh noh ya ka chnat bordiñ na u James hajrong ka yurim wa ym ye u wow pynbait ya i eh ha ka chnat iwa da pynman ya ki Company saam bordiñ wow pyndooh bordiñ ya ka jylla.
Hawa klam ynne ka sngi, u Rymbui da kyntait u wa em i piah ha ka UDP, deiwa ong leh wa ka sorkar MDA em ko ya ka Coordination Committee yow pynbait ya iwon iwon i eh hapoh yung, wei kam ka kynhun synrop da emkaam wow ya syllok.
Da pdiang u wa i pyndooh bordiñ næ ka Load Shedding da ktah sakhiat i yei rukom im wa man-ka-sngi yong ki paidbah, tangwa da pynksan u leh wa u Montri ka chnat bordiñ wei kamjooh u Montri Rangbah da chimkhia ki ya ini i kaam deiwa yaklam leh wa ka sorkar India yow pynlait ya ka jylla na i eh, heiwa da pynrap leh wa ini i eh ym toh iwa ye u pynbait wut wut.
U Rymbui uwa man leh u Montri ha ka chnat puræ puthi da ong u wa i pyndooh bordiñ da ktah ko leh ya kiwa lai puræ puthi khamtam kiwa yakhun ya ki Exam Online.
Hawa kylli ya i long i man toh neidaw wym krehkaam ka chnat bordiñ, neiliang u MLA ka UDP da kyntait u wow pynbaad tangwa da ong u wa lada em kiyi kiyi kiwa haap wow pynbiat næ rai toh wow leh bait da ka Coordination Committee.
U Rymbui da ong u wa em u i chaniah ha u James Sangma wa daw ye u wow pynbait ya i eh, neibhah da yoh u yei kyrchaan yow yaleh wow pyndooh ya iwa eh heiwa da pynrap biang wa ini ym toh i kaam wa ye u pynbait smat katni katni.
